Самарқанд шаҳрида Абу Даби Тараққиёт жамғармаси иштирокида сув таъминоти тизимлари ва йўл тармоқларини модернизация қилиш ишларига киришилди, деб хабар беради ЎзА.
Ўзбекистон ва Абу Даби Тараққиёт жамғармаси ўртасида 2022-2026 йиллар лойиҳасини амалга ошириш учун 4 йиллик имтиёз даврини ўз ичига олган, 17 йилда қайтариш муддати билан қарз битими имзоланган. Лойиҳанинг техник иқтисодий асослари ҳамда тендер ҳужжатлари Вазирлар Маҳкамасининг 2020 йил 18 ноябрдаги йиғилиш баёнига асосан Wоrley Parsons Uzbekistan Engineering МЧЖ томонидан ишлаб чиқилган.
Лойиҳани жадаллаштириш мақсадида иш ҳажмлари 4 та лотга ажратилган, халқаро тендер савдоларига “Қурилиш ишларини тайёр ҳолда топшириш” шарти билан эълон берилиб, тендер савдолари ўтказилиб пудратчи компаниялар аниқланган.
Биринчи лотда Амир Темур кўчасининг Бўстонсарой кўчасидан Гагарин кўчасигача бўлган 2,3 километр қисмида ҳамда Гагарин кўчасининг Гулобод кўчасидан М-37 автомобиль йўлигача бўлган 9,2 километр қисмида қуриш ва реконструкция ишлари амалга оширилади. Тендер натижалари бўйича ушбу 32,9 миллион АҚШ доллари миқдоридаги вазифани New Теch Samarkand, Sinoindustrial Tashkent ҳамда Туркиянинг Tekar Teknik Arastirma Ticaret Limited Sirketi корхоналаридан иборат консорсиум амалга оширади.
Иккинчи лотга Гагарин ва Мирзо Улуғбек кўчалари кесишмасида (умумий узунлиги 750 метр) ҳамда Гагарин ва Рудакий кўчалари кесишмасида (умумий узунлиги 650 метр) туннель ҳамда Гагарин кўчасидаги темирйўл устида 78 метрлик, шу кўча давомидаги Сиёб канали устида 165 метрлик кўприк қурилади.
Умумий қиймати 84,2 миллион АҚШ доллари бўлган бу туннель ва кўприклар қурилиши “Me’mor Utkir Chovka LLC” ва Хитойнинг Shaanxi Road and Bridge Group Co., Ltd корхоналари консорсиуми томонидан бажарилади.
Кўприк ва туннеллар босқичма-босқич қурилади ҳамда бу жараёнда йўлларда транспорт воситалари ва пиёдалар ҳаракати тўхтатилмайди, хавфсиз ҳаракатланиш чоралари кўрилади. 2023 йил якунига қадар Гагарин ва Мирзо Улуғбек кўчалари кесишмасидаги туннелнинг биринчи босқичини якунлаш кўзда тутилган.
Учинчи (31,6 миллион долларлик) ва тўртинчи (13,9 миллион долларлик) лот Самарқанд шаҳри сув иншоотлари билан боғлиқ бўлиб, унда Даҳбет ва Чўпон ота сув иншоотлари ҳамда 6 та насос станцияларини реконструкция қилиш, Амир Темур ва Гагарин кўчаларида 13,9 километр янги ичимлик сув тармоқлари қуриш белгиланган.
Мазкур объектлар Ўзбекистон томонидан MEСMEР-EAST LLC ва Туркиянинг GÜÇLÜ İNŞААТ корхонасидан иборат консорсиум томонидан қурилади. Айни пайтда Амир Темур кўчасида 2,3 километр масофага сув тармоғи тортиш ишлари бошланган. Ушбу объектда илк бор хориждан келтирилган диаметри 500 миллиметр бўлган чўян қувурлардан фойдаланилмоқда. Сув ва бошқа коммуникация тармоқлари тортиб бўлингач ушбу кўчани реконструкция қилишга киришилади.
Изоҳ (0)