O‘zbekistonda piyoz narxi pasayishda davom etmoqda

O‘zbekistonda piyozning ulgurji narxlari dinamikasida pasayish tendensiyasi shakllangan. Bu haqda EastFruit xabar berdi.

O‘tgan haftada ushbu mahsulotlar narxi avvalgi haftalarga qaraganda tezroq pasayishda davom etdi.

Xalqaro loyiha guruhi meva-sabzavot mahsulotlarining ulgurji narxlarini har hafta monitoring qilib boradi. Shunga ko‘ra, O‘zbekistonda piyozning ulgurji narxlari mintaqa mamlakatlari orasida eng past darajaga tushib ketdi. 

Narxlar monitoringi natijalariga ko‘ra, 2023-yilning 3-martidan 10-martigacha O‘zbekistonda piyozning o‘rtacha ulgurji narxi 7 000 so‘mdan 6 000 so‘m/kg gacha ya’ni o‘tgan haftada 14 foizga pasaygan.

Oxirgi oy davomida shakllangan pasayish tendensiyasi hisobga olinsa, 2023-yilning 10-fevralidan 10-martigacha ushbu mahsulotlarning o‘rtacha ulgurji narxi 25 foizga pasaygan.

O‘tgan yillar bilan solishtirganda, hozirgi ulgurji narxlar hali ham yuqori.

2023-yil 10-mart holatiga ko‘ra, O‘zbekistonda piyozning o‘rtacha ulgurji narxi o‘tgan yilning ayni sanasidagidan roppa-rosa 3 baravar, 2020—2021-yillarning shu sanasida qayd etilgan darajadan esa 5-6 baravar yuqori.

Bunga sabab sifatida ikki asosiy omilni aniqlandi, ularning ta’siri ostida o‘tgan oy davomida pasayish tendensiyasi shakllandi.

Birinchisi, joriy yilning yanvar—fevral oylarida O‘zbekistonda piyoz importining oshishi bo‘ldi. Ikkinchisi, fevral va mart oyi boshlarida o‘rtacha sutkalik haroratning keskin oshishi. Bu noto‘g‘ri sharoitlarda saqlanayotgan piyoz zaxiralarining xavfsizligiga salbiy ta’sir ko‘rsatmoqda.

O‘z navbatida, bu holat ushbu mahsulotlar importining rekord hajmi bilan bir qatorda ishlab chiqaruvchilarni piyoz zaxiralarini tezda sotishga va bu orqali ichki bozordagi taklif hajmini sezilarli darajada oshirishga majbur qilmoqda.

Bundan tashqari, qariyb bir oydan so‘ng ichki bozorga kuzgi piyozning ulgurji partiyalari yetkazib beriladi. Bu esa, o‘z navbatida, fermer va savdogarlarni ham o‘tgan yilgi piyoz zaxirasini tezda sotishga majbur qilmoqda.

Ushbu mahsulotlar eksportiga kelsak, hozircha O‘zbekistonda piyoz eksporti uchun joriy yilning aprel oyi oxirigacha vaqtinchalik cheklovlar mavjud.

2023-yil 10-mart holatiga ko‘ra, mintaqa mamlakatlarida piyozning o‘rtacha ulgurji narxi (1 kg uchun dollarda): O‘zbekiston — 0,53 dollar; Tojikiston — 0,73 dollar; Gruziya — 0,85 dollar; Moldova — 0,91 dollar; Polsha — 0,97 dollar; Ukraina — 1,23 dollar.

Avvalroq Qirg‘iziston piyoz eksportiga qo‘yilgan taqiqni muddatidan oldin bekor qilgani haqida xabar berilgandi.