Ўзбекистонда иссиқхона помидорлари нархи ҳар ҳафта рекордларни янгилаб, тез ўсиб бормоқда. Охирги ойда уларнинг улгуржи нархи ўртача бир ярим бараварга, йил бошидан бери эса деярли 70 фоизга ошди. Бу ҳақда EastFruit хабар берди.
Бозор иштирокчиларининг фикрича, бунинг асосий сабаби январь ойидаги аномал совуқ пайтида иссиқхоналарда ҳосилнинг катта йўқотилишидир.
2023 йил январь ойининг иккинчи ўн кунлигида иссиқхонадаги қизил думалоқ помидорнинг ўртача нархи 12 минг сўмдан 19 минг сўм/кг га ошди, яъни икки ҳафта ичида ўсиш 27 фоиз. Ойнинг охирида об-ҳаво шароити яхшиланди ва нарх барқарорлашди.
3 февралдан 10 мартгача думалоқ қизил иссиқхона помидорининг ўртача улгуржи нархи 18 минг сўмдан 27 минг сўм/кг га, яъни 50 фоизга ошди.
Натижада жорий йил бошидан 10 мартгача ушбу маҳсулотларнинг улгуржи нархлари 80 фоизга ошган.
2023 йил 10 март ҳолатига кўра, Ўзбекистонда қизил думалоқ иссиқхона помидорининг ўртача улгуржи нархи ўтган йилнинг шу санасига нисбатан 1,5 баравар ва 2021 йилнинг шу санасига нисбатан қарийб 2 баравар юқори бўлди.
Январь ва февраль ойининг биринчи ўн кунлигида пушти иссиқхона помидорининг нархи нисбатан барқарор бўлган бўлса-да, сўнгги бир ой ичида улар кескин ошган.
10 февралдан 10 мартгача пушти помидорнинг ўртача улгуржи нархи 20 минг сўмдан 33 минг сўм/кгга яъни бир ойда 65 фоизга ошган.
2023 йил 10 март ҳолатига кўра, Ўзбекистонда пушти помидорнинг ўртача улгуржи нархи ўтган йилнинг шу санасига нисбатан 2,8 баравар ва 2021 йилнинг шу санасига нисбатан 2,2 баравар юқори бўлди.
Ўзбекистон мева-сабзавотларининг йирик экспортчиси ГДФ Эхспорт компаниясининг тижорат директори Ҳусан Ҳайдаровга кўра, январь ойидаги аномал совуқ Ўзбекистонда янги помидор нархининг тез ошишига асосий катализатор бўлди.
Аёз пайтида кўплаб иссиқхона мажмуаларида газ босими сезиларли даражада пасайди, чунки бу даврда бутун мамлакат бўйлаб табиий газ танқислиги мавжуд эди. Шунга кўра, бу иссиқхоналарда ҳарорат кескин тушиб кетди ва ўртача 50 фоиздан 70 фоизигача помидор экинлари нобуд бўлди, — дейди Хусан Ҳайдаров.
Энг кўп йўқотишлар Сурхондарё, Қашқадарё, Самарқанд ва Тошкент вилоятлари ҳамда Фарғона водийсидаги иссиқхоналарда кузатилди.
Экспертга кўра, яқин келажакда Ўзбекистонга арзонроқ нархларда помидор импорт қилинмаса, ушбу маҳсулотнинг нархи сезиларли даражада пасайиши қийин.
Изоҳ (0)