Toshkent va Qatar poytaxti Doha shaharlari orasida to‘g‘ridan to‘g‘ri aviaqatnovlar yo‘lga qo‘yilishi kutilmoqda. Bu haqda Investitsiyalar, sanoat va savdo vazirligi axborot xizmati xabar berdi.
Xabarga ko‘ra, 14-mart kuni investitsiyalar, sanoat va savdo vaziri Laziz Kudratov Qatarning O‘zbekistondagi favqulodda va muxtor elchisi Hasan Hamza Hashem bilan uchrashdi. Suhbat chog‘ida ikki tomonlama savdo-iqtisodiy va investitsiyaviy hamkorlikning dolzarb masalalari muhokama qilindi.
Xususan, Prezident administratsiyasi rahbari Sardor Umurzoqovning 2023-yil fevral oyida Dohaga tashrifi davomida erishilgan kelishuvlar ijrosi ko‘rib chiqildi.
Muzokaralar vaqtida ikki davlat o‘rtasida amalda bo‘lgan barcha kelishuvlarning samarali va o‘z vaqtida bajarilishini taʼminlash, ikki tomonlama hamkorlikning yangi yo‘nalishlarini belgilash, biznes tuzilmalari o‘rtasida sheriklik munosabatlarini o‘rnatish, to‘siqlik qiluvchi muammolarni aniqlash va ularni bartaraf etishga qaratilgan yechim topish bo‘yicha qo‘shma ishchi guruh tuzishga kelishib olindi.
Uchrashuv yakunlari bo‘yicha qator qo‘shma loyihalarni, jumladan Sirdaryo va Surxondaryo viloyatlarida bug‘-gaz elektr stansiyalarini qurish, shuningdek, sayyohlik oqimi va o‘zaro savdo hajmini oshirish maqsadida Qatar Airways tomonidan ikki mamlakat poytaxtlari o‘rtasida to‘g‘ridan to‘g‘ri aviaqatnovlarni tashkil etish bo‘yicha tashabbuslarni hayotga tatbiq etishni jadallashtirishga kelishildi.
Izoh (0)