Ayshe Barim — turk kinosanoatining eng nufuzli shaxslaridan biri bo‘lib, yarim yildan buyon “hukumatni ag‘darishga urinishga ko‘maklashish” ayblovi bilan hibsda saqlanmoqda. Turkiya televideniyesining aksariyat yulduzlari bilan hamkorlik qiluvchi ID agentligi asoschisi hibsga olinganidan olti oy o‘tib sud oldida javob berdi, deb xabar bermoqda Turkiyaning Cumhuriyet nashri.
Sud zaliga o‘nlab taniqli aktyor va aktrisalar shaxsan kelib, Barimni qo‘llab-quvvatlashlarini bildirishdi. Ular orasida “Muhtasham yuz yil” filmidagi sulton Sulaymon rolini ijro etgan Xalit Ergench, uning rafiqasi Berguzar Korel, shuningdek, Serenay Sarikaya, Hande Erchel, Zerrin Tekindor, Ipek Bilgin va boshqalar bor. Ularning ishtiroki hokimiyat tomonidan kuchayib borayotgan bosim va jinoiy ishlarga aralashish xavfiga qaramay, kuchli birdamlik ishorasi bo‘ldi.
Sudda so‘zga chiqqan Ayshe Barim ko‘z yoshlarini tiya olmadi: “Men bu jazoni adolatsiz va nomutanosib deb hisoblayman. Men yashash huquqimni va insoniy qadr-qimmatimni qaytarib olmoqchiman. Men yashashni xohlayman.” Uning so‘zlariga ko‘ra, u sog‘lig‘iga tahdid soladigan sharoitda saqlanmoqda va tibbiy yordamga muhtoj, biroq hozircha bularni to‘liq hajmda ololmayapti.
Sud jamoatchilik bosimiga qaramay, Barimni hibsda qoldirishga qaror qildi. Navbatdagi majlis 1-oktyabrga belgilangan.
Ayblov versiyasiga ko‘ra, 2013-yilda Gezi bog‘idagi norozilik namoyishlari chog‘ida Barim go‘yoki o‘z professional aloqalaridan foydalanib, aktyorlarni namoyishlarda ishtirok etishga va ijtimoiy tarmoqlarda norozilik materiallarini e’lon qilishga undagan. ID agentligiga aloqador aktyorlarning ta’kidlashicha, ular norozilik namoyishlarida ixtiyoriy ravishda qatnashgan.
Izoh (0)