Bolalarni it kabi akillatgan defektolog bo‘yicha tekshiruv boshlangani haqida xabar berilgandi. Bolalar ombudsmanining holat yuzasidan munosabati e’lon qilindi.
Unda aytilishicha, Bolalar ombudsmanining ushbu ayol ish uslubiga ilmiy va kasbiy baho berish uchun kiritgan so‘rovi asosida malakali defektolog va logopedlardan iborat ishchi guruh o‘rganish o‘tkazgan.
Natijada pedagog D.J.ning ish usuli mutlaqo ilmiy asoslanmagan, murakkab duduqlanish muammosiga tor va ibtidoiy yondashuvda ekani, duduqlanishni bartaraf etishda qo‘llayotgan ruhiy va jismoniy zo‘ravonlik usullari bolalarning sog‘lig‘i va tarbiyasiga jiddiy zarar keltirishi hamda pedagogika qoidalariga butunlay zidligi to‘g‘risida xulosa berilgan.
Buning asosida Bolalar ombudsmani tomonidan prokuratura organlariga holatga huquqiy baho berish to‘g‘risida so‘rov kiritilgan va D.J.ga nisbatan jinoyat ishi yurituvi olib borilgan. Ma’lum vaqt o‘tganidan so‘ng D.J. avvalgidek duduqlanishi bo‘lgan bolalar bilan o‘zining ilmiy asoslanmagan, defektologiyaga daxli yo‘q amaliyotini davom ettirgani kuzatildi.
Uning bola manfaatlariga zid harakatlari yuzasidan 2-iyun kuni Bolalar ombudsmani Bosh prokuraturaga tegishli so‘rov yubordi. Natijada 25-iyunda Yunusobod tuman prokuraturasi tomonidan jinoyat ishini tugatish to‘g‘risidagi qaror (17.04.2025-yilda chiqarilgan) bekor qilinib, ish hujjatlari tergov harakatlarini olib borish uchun Yunusobod tuman IIO FMB huzuridagi Tergov bo‘limiga yuborilgan.
Tergov bo‘limi tomonidan 4-iyulda uning bola manfaatlariga zid harakatlari yuzasidan jinoyat ishi qo‘zg‘atilib, hozirda dastlabki tergov harakatlari olib borilmoqda.
Bolalar ombudsmani bola manfaatlari nuqtai nazaridan mazkur ish bo‘yicha o‘z kuzatuvini davom ettiradi. Holat yuzasidan qo‘shimcha ma’lumot beriladi.
2024-yilning 27-fevral kuni mazkur ayolga nisbatan Jinoyat kodeksining 168-moddasi 1-qismi (firibgarlik) bilan jinoyat ishi qo‘zg‘atilgan.
Jinoyat ishi tergovi davomida ayolning bolalar duduqlanishi muammosiga oid har qanday faoliyat bilan shug‘ullanishi to‘xtatilgani, u bunday xizmat ko‘rsatishni davom ettirmaslik yuzasidan tegishli tartibda ogohlantirilgani aytilgandi.
Izoh (0)