Farg‘ona viloyatining Quva tumanida chiqindi tashish xizmati uchun aholidan asossiz pul undirilgani xabar qilingandi. Chiqindilarni boshqarish va sirkulyar iqtisodiyotni rivojlantirish agentligi bu borada raddiya bilan chiqdi.
Iyul oyining boshlarida Raqobat qo‘mitasi Quva tumanidagi mahallalarda “Tozalik Sanitar Servis” MCHJ tegishli asosida xizmat ko‘rsatmagani natijasida aholidan 1,7 milliard so‘mdan ziyod ortiqcha mablag‘ hisoblanganini ma’lum qilgandi. Chiqindilarni boshqarish agentligining bildirishicha, boshqarma tomonidan chiqarilgan qarorda 1 mlrd 761 mln so‘m mablag‘ hech bir asossiz noreal deb topilgan.
Raddiyada qayd etilishicha, Raqobatni rivojlantirish va iste’molchilar huquqlarini himoya qilish qo‘mitasi Farg‘ona viloyati hududiy boshqarmasi tomonidan “Tozalik Sanitar Servis” MCHJ chiqindilarni olib chiqib ketish xizmatini ko‘rsatadigan Quva tumanidagi “Baynalminal”, “Jalayer”, “Iftixor”, “Katta Qashqar”, “Mustaqillik”, “Namuna”, “So‘fi” MFYlarda Vazirlar Mahkamasining 2019-yil 6-fevraldagi 95-son qaroriga asosan tasdiqlangan nizomda belgilangan tartibda o‘rganishlar o‘tkazilmagan. Xizmatlar ko‘rsatilmagani yoki tegishlicha bo‘lmagan sifatdagi xizmatlar ko‘rsatilgani holatini tasdiqlovchi dalolatnoma rasmiylashtirilmagan.
“Baynalminal”, “Jalayer”, “Iftixor”, “Katta Qashqar”, “Mustaqillik”, “Namuna”, “So‘fi” MFYlar raislari hamda ushbu mahallalarda istiqomat qiluvchi aholi tomonidan sanitar tozalash xizmatlari ko‘rsatilmagani bo‘yicha shu kungacha hech qanday murojaatlar kelib tushmagan bo‘lsa-da, boshqarma tomonidan ushbu hududlarda hech qanday asoslarsiz “xizmat ko‘rsatilmagan” deb qaror qabul qilingan.
Vaj qilingan ushbu o‘rganishda Quva tumanidagi yuqorida nomlari keltirilgan mahallalarga borilmagan yoki Chiqindilarni boshqarish agentligi va uning viloyat boshqarmasiga hamkorlik bo‘yicha hech qanday murojaatlar qilinmagan hamda ushbu hududda haqiqatda xizmat ko‘rsatilgani haqida GPS monitoring tizimidan ma’lumotlar olinmagan.
Agentlik xabarida aytilishicha, Raqobat qo‘mitasi tomonidan avval ham Qashqadaryo, Sirdaryo, Farg‘ona va Namangan viloyatlaridagi noreal qarzdorliklar haqida xabarlar eʼlon qilingan bo‘lib, mazkur rasmiy maʼlumotlarni Chiqindilarni boshqarish agentligidan emas, boshqa tashkilot va idoralardan olishga urinilgan.
Bu kabi o‘rganishlar ishchi guruh tarkibida soha faoliyati haqida to‘liq maʼlumotga va dalillarga ega bo‘lmagan xodimlarning shunchaki soxta va yuzaki xulosalari asosida tayyorlanib, jamoatchilik eʼtiboriga noto‘g‘ri maʼlumot berilgan.
“Qayd etish joizki, ushbu o‘rganishlarda agentlik va uning hududiy boshqarmalarining mazkur yo‘nalishdagi birorta mansabdor vakili ishtirok etmagan va bu o‘rganish jarayonlarining asosi, hujjatlari qo‘mita va boshqarma masʼullaridan so‘ralganda ham taqdim eta olishmagan”, deyiladi raddiyada.
Ma’lum qilinishicha, ayni paytda “Farg‘ona Tozalik Sanitar Servis” MCHJ tomonidan boshqarmaning qarorini haqiqiy emas deb topish yuzasidan tegishli sudga murojaat qilingan.
Avvalroq xuddi shunday holatda boshqarma viloyatning Rishton tumanida chiqindilarni olib chiqib ketish xizmatini olib boruvchi “Agro Rishton Ta’mir Servis” MCHJ yetarli darajada xizmat ko‘rsatmagani yuzasidan aprel oyida chiqargan qarori 30-iyun kuni sudda ko‘rib chiqilib, haqiqiy emas deb topilgan.
O‘zbekistonda joriy yil 1-avgustdan chiqindi xizmatlaridan qarzdorlar uchun elektr to‘loviga cheklov o‘rnatiladi. Har oyning 3-sanasigacha chiqindi xizmatidan qarzdorlar to‘g‘risidagi maʼlumotlar “Hududiy elektr tarmoqlari” AJ billing tizimiga uzatiladi. So‘ngra qarzdor iste’molchilarga har oyning 5-sanasigacha xabarnoma yuboriladi. Ogohlantirish yuborilganidan so‘ng, qarzdorlikni bartaraf etishga besh kun muddat beriladi.
Izoh (0)