Саудия Арабистони суверен жамғармаси мамлакатнинг янги миллий авиакомпанияси фойдаланиши учун Boeing самолётларининг катта партиясини сотиб олиш бўйича келишувни ёпишга яқин турибди. Бу ҳақда The Wall Street Journal (WSJ) манбаларга таяниб хабар берди.
Маълум бўлишича, умумий буюртма 35 миллиард долларни ташкил этади ва самолётлар сони 100 та ёки ундан кўп бўлиши мумкин.
WSJ манбаларига кўра, яқин кунларда ушбу келишув ҳақида расман эълон қилиниши мумкин ва бу самолётлар мўлжалланган янги миллий авиакомпания тақдимотига тўғри келади.
Буюртма қилинган самолётлар орасида кенг фюзеляжли моделлар бўлади, улар кўпроқ узоқ масофаларга парвозлар учун мўлжалланган.
Саудия ҳукумати 2021 йилда янги авиакомпания яратиш режаларини эълон қилди. Унинг ишга туширилиши асосан нефть қазиб олишга таянадиган мамлакат иқтисодиётини диверсификация қилиш дастурининг бир қисмидир.
Саудия расмийларининг ҳисоб-китобларига кўра, иккинчи миллий авиаташувчининг ташкил этилиши мамлакатнинг глобал бизнес марказига айланиши ва минтақадаги бошқа авиакомпаниялар билан рақобатлашишига ёрдам беради.
Изоҳ (0)