Qoraqalpog‘iston hamda Namangan viloyatida elektr energiyasidan noqonuniy foydalanganlar 350 million so‘mdan ziyod zarar yetkazdi. Bu haqda iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, Bosh prokuratura huzuridagi departamentning Qorao‘zak tuman bo‘limi tomonidan IIB va tuman ETK xodimlari bilan hamkorlikda o‘tkazilgan tergovga qadar tekshiruvda, “T.B.” fermer xo‘jaligi masʼul shaxslari xo‘jalik yer maydonlarini sug‘orish uchun quvvati 110 kVt/s bo‘lgan suv nasosini umumiy foydalanishdagi elektr tarmog‘iga o‘zboshimchalik bilan ulagan. Ular 156 million so‘mlik elektr energiyasidan noqonuniy foydalangani aniqlangan.
Shu kabi, departamentning To‘raqo‘rg‘on tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “N.F.” MCHJ rahbari M.A. va boshqalar MCHJning muzlatkich omborini hech qanday hujjatsiz umumiy foydalanishdagi elektr tarmog‘iga o‘zboshimchalik bilan ulab, 136,5 million so‘mlik elektr energiyasidan noqonuniy foydalangani aniqlangan.
Bundan tashqari, departamentning Namangan shahar bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “S.T.” MCHJ rahbari U.M. va boshqalar MCHJning tikuvchilik sexini umumiy foydalanishdagi elektr tarmog‘iga o‘zboshimchalik bilan ulab, 70,3 million so‘mlik zarar yetkazganligi aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Navoiy, Farg‘ona, Andijon, Samarqandda gaz va elektr energiyasidan noqonuniy foydalanganlar 2,5 milliard so‘mdan ziyod zarar yetkazgani xabar qilingandi.
Izoh (0)