Navoiy, Farg‘ona, Andijon, Samarqandda gaz va elektr energiyasidan noqonuniy foydalanganlar 2,5 milliard so‘mdan ziyod zarar yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, bosh prokuratura huzuridagi departamentning Navoiy viloyat boshqarmasi tomonidan “Hududgaz Navoiy” gaz ta’minoti filiali xodimlari bilan hamkorlikda o‘tkazilgan tergovga qadar tekshiruvda, Qiziltepa tumanidagi “Sh.D.” MCHJ mas’ul shaxslari korxona issiqxonasiga o‘rnatilgan elektron gaz hisoblagichga tashqi tomondan shikast yetkazib, jami 950,4 million so‘mlik tabiiy gazdan noqonuniy foydalangani aniqlangan.
Shuningdek, departamentning Marg‘ilon shahar bo‘limi tomonidan o‘tkazilgan tergovga qadar tekshiruvda, Marg‘ilon shahar ETK mas’ul shaxslari o‘z xizmat vazifalariga sovuqqonlik bilan qaragani oqibatida, “E.V.” unitar korxonasidagi 3 ta elektr hisoblagich ro‘yxatdan o‘tkazilmasdan qolib, jami 684,6 million so‘mlik elektr energiyasidan noqonuniy foydalanilgani aniqlangan.
Departamentning Andijon shahar bo‘limi tomonidan viloyat DXX xodimlari bilan hamkorlikda o‘tkazilgan tadbirda, “I.p.” MCHJ mas’ul shaxslari korxonaning ishlab chiqarish sexidagi elektr hisoblagichga tashqi ta’sir o‘tkazib, jami 682,1 million so‘mlik elektr energiyasidan noqonuniy foydalangani aniqlangan.
Departamentning Jalaquduq tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “B.s.” MCHJ mas’ul shaxslari MCHJga qarashli toshni qayta ishlash sexida umumiy foydalanishdagi elektr tarmog‘iga o‘zboshimchalik bilan ulanib, jami 238,1 million so‘mlik elektr energiyasidan noqonuniy foydalangani aniqlangan.
Shu kabi, departamentning Bo‘ston tumani bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “O.A.” fermer xo‘jaligi mas’ul shaxslari xo‘jalik chorva binosini umumiy foydalanishdagi elektr tarmog‘iga o‘zboshimchalik bilan ulab, jami 210,6 million so‘mlik elektr energiyasidan noqonuniy foydalangani aniqlangan.
Departamentning Kattaqo‘rg‘on tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda esa, fuqaro M.Sh. parrandachilik fermasidagi elektr hisoblagichning himoya qopqoqlarini buzib, tashqi ta’sir ko‘rsatib, jami 109,9 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) va 207-moddasi (mansabga sovuqqonlik bilan qarash) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)