Qirg‘izistonda bir qator deputatlar zo‘ravonlik jinoyatlari sonini kamaytirish uchun pornosaytlarni taqiqlashni taklif qildi. Bunday taklif nazarda tutilgan qonun loyihasi jamoatchilik muhokamasiga taqdim etildi.
Xalq vakillarining so‘zlariga ko‘ra, so‘nggi paytlarda jinsiy zo‘ravonlik bilan bog‘liq jinoyatlar soni keskin oshgan. Jazo choralarining kuchaytirilishi va jarimalarning joriy etilishi jinoyatchilarga ta’sir ko‘rsatmayapti. Shu sababli deputatlar internetda pornografiya tarqalishini taqiqlamoqchi.
Qonun loyihasida qayd etilishicha, pornosaytlar aniqlangan kundan boshlab 24 soat ichida bloklanishi va bunday kontent mavjud saytlar egalari shu muddat ichida hammasini o‘chirib tashlashi kerak. Agar veb-resurs egalari buni bajarishdan bosh tortsa, u holda bunday resurslar ikki oygacha bloklanadi.
Shu bilan birga, veb-resursda pornografik jihatlar bor deb hisoblagan har bir kishi tegishli idoralarga shikoyat qilishi mumkin.
Avvalroq Qirg‘izistonda filmlarda pornografik sahna ko‘rinishlariga taqiq joriy etilgandi.
Izoh (0)