Xitoy Xalq Respublikasi Davlat kengashi bosh vaziri — Xitoy hukumati rahbari lavozimini Li Syan egalladi. 11-mart kuni Butunxitoy xalq vakillari kengashi deputatlari uning nomzodini ma’qulladi, Xitoy raisi Si Szinpin esa tayinlov haqidagi farmonni imzoladi, deb xabar bermoqda Sinxua.
Li Syan 2013-yildan beri hukumatni boshqarib kelayotgan Li Ketsyanning o‘rniga Xitoy Davlat kengashi bosh vaziri etib tayinlandi. 2023-yilda Li Ketsyanning ikkinchi besh yillik vakolati tugagandi. Xitoy qonunchiligi bir odam bosh vazir lavozimini ikki muddatdan ortiq egallashini taqiqlaydi.
Bunga qadar Li Syan Shanxay partiya qo‘mitasi kotibi lavozimida Shanxayga rahbarlik qilgan. U xususan, Xitoyda va butun dunyoda eng og‘ir kechgan COVID-19 pandemiyasi davrida shahardagi karantin choralariga ma’sul bo‘lgan.
Li Syanning so‘nggi 20 yildagi siyosiy faoliyati Si Szinpin bilan chambarchas bog‘liq. Siyosatshunoslar Si Szinpin 10-mart kuni tarixda ilk bor uchinchi besh yillik muddatga saylangan rais bo‘lganidan keyin hukumatni Li Syan boshqarishini kutgandi. Davlat kengashi bosh vazirlaridan farqli o‘laroq, XXR raisi uchun ikki besh yillik muddat cheklovi olib tashlangan.
Izoh (0)