Shavkat Mirziyoyev 11-mart kuni Birlashgan Arab Amirliklari prezidenti Shayx Muhammad bin Zoid Ol Nahayon bilan telefon orqali muloqot qildi. Bu haqda Prezident matbuot xizmati xabar berdi.
Ma’lum qilinishicha, davlat rahbari BAA prezidentini tavallud kuni bilan samimiy tabriklab, unga mustahkam sog‘lik va baxt-saodat, davlatchilik faoliyatida katta muvaffaqiyatlar, ushbu mamlakatning do‘st xalqiga tinchlik-osoyishtalik va ravnaq tilagan.
Shuningdek, suhbatda ko‘p qirrali hamkorlikni, eng avvalo, savdo, investitsiyalar, innovatsiya va yuksak texnologiyalar, “yashil” energetika, qishloq xo‘jaligi, logistika va transport sohalaridagi aloqalarni yanada kengaytirish istiqbollari muhokama qilingan.
Keyingi yillarda O‘zbekiston—BAA munosabatlarida jadal rivojlanish kuzatilayotgani mamnuniyat bilan qayd etilgan. O‘tgan yili o‘zaro savdo hajmi ikki barobarga ko‘paydi. O‘zbekistonda 240 ta qo‘shma korxona faoliyat yuritmoqda, loyihalar portfeli 3 milliard dollardan oshg.an
“Neft-kimyo, oziq-ovqat sanoati, infratuzilmani rivojlantirish sohalarida, tog‘-kon va metallurgiya tarmoqlarida yangi kooperatsiya loyihalarini amalga oshirish hamda moliyaviy-texnik hamkorlik va madaniy-gumanitar almashinuv dasturlarini kengaytirishdan ikki mamlakat ham manfaatdor ekani taʼkidlandi”, — deyiladi xabarda.
O‘zbekiston va BAA yetakchilarining telefon orqali muloqoti har doimgidek ochiq, samimiy va do‘stona ruhda o‘tgan.
Izoh (0)