Ukraina futbol bo‘yicha 2030-yilgi Jahon Chempionati mezbonligiga nomzod mamlakatlar qatoridan chiqarilishi mumkin. Ukraina 2022-yilning oktabr oyida Ispaniya va Portugaliya bilan birga musobaqa mezbonligi uchun ariza topshirgandi.
The Athletic xabariga ko‘ra, mamlakatdagi urush holatini inobatga olgan holda Ukrainaning 7 yildan keyin mundialni qabul qila olishi masalasi borgan sari so‘roq ostida qolmoqda.
Bundan tashqari noyabr oyida Ukraina futbol assotsiatsiyasi prezidenti Andrey Pavlenko tushumlarni talon-taroj qilganlikda ayblanib, hibsga olinganidan keyin tashkilotda beqaror vaziyat hukm surmoqda. Fevral oyida sud Pavlenkoni bir oyga o‘z lavozimidan chetlatgandi.
Ispaniya va Portugaliyaning birgalikdagi arizasida Ukraina o‘rnini Marokash egallashi mumkin. Marokash 2018-yildayoq JCH—2030 ga mezbonlik qilish niyatida ekanini ma’lum qilgandi. Bundan tashqari Marokash geografik tomondan ma’qulroq variant hisoblanadi. Mamlakatni Ispaniya bilan bir necha kilometr ajratib turadi, Ispaniya va Ukraina orasidagi masofa esa 1000 kilometrdan oshiq.
Yevropa va Afrika mintaqasi mamlakatlarini birlashtirgan ariza ovoz berish jarayonida g‘alaba uchun yuqori imkoniyatga ega bo‘lishi mumkin. Tomonlar buni ham inobatga olgan.
2030-yilgi Jahon Chempionati mezboni nomi FIFAning 2024-yil bo‘lib o‘tadigan 74-kongressida e’lon qilinadi.
Ayni vaqtda Yevropaning “uchlik” arizasidan tashqari Urugvay, Argentina, Paragvay va Chili ham birgalikda musobaqani o‘tkazishga rasman ariza topshirgan.
Saudiya Arabistoni, Misr va Gretsiya mamlakatlari ham birgalikda JCH—2030 mezbonligi uchun nomzodlar qatoriga qo‘shilish harakatida ekani xabar qilingandi.
Izoh (0)