Украина футбол бўйича 2030 йилги Жаҳон Чемпионати мезбонлигига номзод мамлакатлар қаторидан чиқарилиши мумкин. Украина 2022 йилнинг октябрь ойида Испания ва Португалия билан бирга мусобақа мезбонлиги учун ариза топширганди.
The Athletic хабарига кўра, мамлакатдаги уруш ҳолатини инобатга олган ҳолда Украинанинг 7 йилдан кейин мундиални қабул қила олиши масаласи борган сари сўроқ остида қолмоқда.
Бундан ташқари ноябрь ойида Украина футбол ассоциацияси президенти Андрей Павленко тушумларни талон-тарож қилганликда айбланиб, ҳибсга олинганидан кейин ташкилотда беқарор вазият ҳукм сурмоқда. Февраль ойида суд Павленкони бир ойга ўз лавозимидан четлатганди.
Испания ва Португалиянинг биргаликдаги аризасида Украина ўрнини Марокаш эгаллаши мумкин. Марокаш 2018 йилдаёқ ЖЧ—2030 га мезбонлик қилиш ниятида эканини маълум қилганди. Бундан ташқари Марокаш географик томондан маъқулроқ вариант ҳисобланади. Мамлакатни Испания билан бир неча километр ажратиб туради, Испания ва Украина орасидаги масофа эса 1000 километрдан ошиқ.
Европа ва Африка минтақаси мамлакатларини бирлаштирган ариза овоз бериш жараёнида ғалаба учун юқори имкониятга эга бўлиши мумкин. Томонлар буни ҳам инобатга олган.
2030 йилги Жаҳон Чемпионати мезбони номи ФИФАнинг 2024 йил бўлиб ўтадиган 74-конгрессида эълон қилинади.
Айни вақтда Европанинг “учлик” аризасидан ташқари Уругвай, Аргентина, Парагвай ва Чили ҳам биргаликда мусобақани ўтказишга расман ариза топширган.
Саудия Арабистони, Миср ва Греция мамлакатлари ҳам биргаликда ЖЧ—2030 мезбонлиги учун номзодлар қаторига қўшилиш ҳаракатида экани хабар қилинганди.
Изоҳ (0)