Қозоғистон фермерлари ҳукуматдан ички бозор учун зарур бўлган пиёз миқдорини ҳисоблаб чиқиб, ортиқчасини экспорт қилишга рухсат беришни талаб қилмоқда. Бу ҳақда Forbes хабар берди.
Деҳқонлар ички бозорда пиёз етарли, ортиқчаси эса чириётганидан хавотирда. Муаммони ҳал қилиш учун Олмаота, Туркистон ва Жамбил вилоят фермерлари “Атамекен” миллий тадбиркорлар палатасига мурожаат қилган.
“Олтай” масъулияти чекланган жамияти раҳбари Нурлан Нурбековнинг айтишича, баҳорги экиш мавсуми яқинлашиб қолган, бироқ ўтган йилги ҳосил ҳали сотилмагани учун уруғ олишга маблағ йўқ. Бундан ташқари, пиёз тез бузиладиган маҳсулотдир — агар у чириб қолса, йўқотишларни ҳеч ким қоплаб бермайди.
“Айни дамда сотувчиларга 1 килограмми 150 тангадан етказиб беришимиз керак бўлган пиёз 1 килограмми камида 300 тангадан сотилмоқда.
Натижада, сотувчилар (ҳатто логистика харажатларини чегириб ташлаганларидан кейин ҳам) 1 кг учун 120-130 тенге фойда кўрмоқда. Ишлаб чиқарувчи эса кейинги мавсум учун уруғ экиш ва сотиб олиш учун маблағ қолдиришга қодир эмас, — дейди фермер.
Тадбиркорларнинг фикрича, қишлоқ хўжалиги ишлаб чиқариш кооперативи фаолияти аслида йирик чакана савдо корхоналари манфаатларига қаратилган. Бозорга маҳсулот етказиб бериш ва нархларни ушлаб туриш юки эса фақат ишлаб чиқарувчилар зиммасига тушади.
Шароит яратиб берилмаса, фермерлар келажакда пиёз етиштирмаслиги ҳам мумкин. Бу аҳоли учун ижтимоий аҳамиятга эга маҳсулот эканлигини ҳисобга олсак, бозор таҳдид остида, — дейилади хабарда.
2023 йилнинг 28 январида мамлакат Қишлоқ хўжалиги вазирлигининг пиёз экспортини тақиқлаш тўғрисидаги буйруғи кучга кирди. Тақиқ уч ойга жорий этилган.
Изоҳ (0)