Turkiyaga ketgan Mudofaa vazirligining tibbiy otryadi O‘zbekistonga qaytib keldi (foto)

Turkiyada 24 kun davomida zilzila oqibatlarini bartaraf etishda ishtirok etgan O‘zbekiston Mudofaa vazirligining malakali harbiy xizmatchilari Toshkentga qaytib keldi. Bu haqda vazirlik matbuot xizmati “Daryo”ga ma’lum qildi.

Prezident Shavkat Mirziyoyevning topshirig‘iga binoan shu yilning 8-fevral kuni Mudofaa vazirligining malakali harbiy xizmatchilaridan iborat tibbiy otryad zilzila oqibatini bartaraf etishda yordam berish hamda jabrlanganlarga tibbiy yordam ko‘rsatish maqsadida Turkiyaga jo‘nab ketgan edi.

Qayd etilishicha, o‘zbekistonlik harbiy xizmatchilar qariyb bir oy davomida zilzilalardan jabr ko‘rgan turk xalqiga insonparvarlik yordami ko‘rsatgan. Shu vaqt davomida ular jami 3860 nafar fuqaroga tibbiy yordam ko‘rsatgan. Ulardan 1795 nafari erkaklar, 1177 nafari ayollar va 888 nafarini esa bolalar tashkil etmoqda.

6-mart kuni Islom Karimov nomidagi Toshkent xalqaro aeroportida Mudofaa vazirligining tibbiy otryadi xodimlarini ommaviy axborot vositalari, keng jamoatchilik vakillari, mudofaa vaziri o‘rinbosari va boshqa rasmiylar kutib olgan.