Шавкат Мирзиёев ва Қосим-Жўмарт Тўқаев 3 март куни Чимкент шаҳрида норасмий учрашув ўтказди. Қозоғистон Ташқи ишлар вазирлиги расмийси Айбек Смадияров нима учун учрашув Чимкентда ташкиллаштирилганига тушунтириш берди. Бу ҳақда Нур.кз хабар берди.
.jpg)
Смадияровнинг сўзларига кўра, Ўзбекистон Қозоғистоннинг энг яқин ҳамкорларидан бири ҳисобланади.
“Давлат раҳбарлари Чимкентда учрашишга қарор қилди, чунки у бир миллион аҳолига эга йирик шаҳар ва Ўзбекистон билан чегарада жойлашган. Биз бу йўналишдаги савдо-сотиқни, транзит салоҳиятини, маданий алоқаларни фаол ривожлантирмоқдамиз. Шунинг учун Қозоғистоннинг бошқа шаҳарларида эмас, балки Чимкентда бўлиши мантиқан тўғри”, — деди у.
Унинг таъкидлашича, ушбу учрашувга оид барча маълумотлар президент матбуот хизмати томонидан тарқатилган.
“Марказий Осиё давлатлари раҳбарлари исталган вақтда учрашиб, айрим масалаларни қўшничилик, қардошлик руҳида муҳокама қилиши мумкинлигидан жуда хурсандман”, — дея қўшимча қилди Айбек Смадияров.
Эслатиб ўтамиз, 3 март Қозоғистон ва Ўзбекистон президентлари Чимкентда норасмий учрашув ўтказган. Суҳбатда Ўзбекистон ва Қозоғистон ўртасидаги стратегик шериклик ва иттифоқчилик муносабатларини янада мустаҳкамлаш, ўзаро манфаатли ҳамкорликни кенгайтириш масалалари муҳокама қилинган. Олий даражада эришилган келишувларга мувофиқ кооперация лойиҳаларини жадаллаштириш масалаларига алоҳида эътибор қаратилган. Давлат раҳбарлари икки мамлакат бош вазирлари ўринбосарлари, махсус ишчи гуруҳлар ҳамраисларининг имзоланган битимлар ва қабул қилинган қарорлар ижросининг бориши тўғрисида ҳисоботларини тинглаган.
Изоҳ (0)