Фарғонада муқаддам судланиб, 18 йил қамоқ жазосини ўтаб чиққан шахс вайронкор ғояларга йўғрилган нашидаларни тинглаб, тарқатиб келгани учун яна судланди. Бу ҳақда “Бу кун” информацион дастурида маълум қилинди.
Қайд этилишича, судланувчи 1999 йили жиноят ишлари бўйича Фарғона вилояти суди томонидан Жиноят кодексининг 159 (Ўзбекистон Республикасининг конституциявий тузумига тажовуз қилиш) ва 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) билан айбли деб топилиб, 18 йилга озодликдан маҳрум этилган. Ушбу эркак белгиланган жазони тўлиқ ўтаб чиққан бўлсада, ўзига тегишли хулоса чиқармаган.
Марғилон шаҳар ИИБ ходимлари томонидан фуқаро Ў.га тегишли бўлган уяли телефон аппарати холислар иштирокида кўздан кечирилган. Текширув давомида унда Ўзбекистон ҳудудига олиб кириш, тайёрлаш ва тарқатиш тақиқланган 10 дан ортиқ диний мазмундаги материаллар сақланаётгани аниқланган. У ақидапарастликка оид материалларни ижтимоий тармоқлардаги шахсий профилига жойлаш орқали 460 дан ортиқ виртуал обуначига таъсир кўрсатишга уринган.
Айбланувчи Жиноят кодексининг 244-1-моддаси билан айбли деб топилиб, 6 йил муддатга озодликдан маҳрум этилди.
Аввалроқ Тошкентда танишига нашида юборгани учун қамалган талаба йигит озод қилингани тўғрисида хабар берилганди.
Изоҳ (0)