Vazirlar Mahkamasining “Turizm mahallalarida muhandislik-kommunikatsiya infratuzilmasini rivojlantirish bo‘yicha qo‘shimcha chora-tadbirlar to‘g‘risida”gi qarori qabul qilindi, deb xabar bermoqda “Dunyo” agentligi.
Hujjatda turizm mahallalarida ichki avtomobil yo‘llari va ko‘priklarni, ichimlik suvi va oqova suv tarmoqlarini qurish va taʼmirlash, elektr taʼminotini yaxshilash hamda aloqa va axborotlashtirish sohasini rivojlantirish bo‘yicha infratuzilma loyihalarini moliyalashtirish uchun 2024—2025-yillarda 205 milliard so‘m mablag‘ ajratilishi belgilab qo‘yilgan.
Qarorda Iqtisodiyot va moliya vazirligi 2024—2025-yillarda davlat budjeti parametrlarini shakllantirishda turizm mahallalarida amalga oshiriladigan infratuzilma loyihalari uchun 200 milliard so‘m mablag‘ni nazarda tutishi belgilangan.
Ushbu hujjat bilan Qoraqalpog‘iston Respublikasi Vazirlar Kengashi, viloyat hokimliklari buyurtmachilar bilan birgalikda ushbu qarorga ilovalar bilan tasdiqlangan manzilli ro‘yxatlarga muvofiq, turizm mahallalaridagi infratuzilma loyihalari loyiha-smeta hujjatlarining o‘z vaqtida ishlab chiqilishini va belgilangan muddatlarda ishga tushirilishini taʼminlashi qayd etilgan.
Shuningdek, infratuzilma loyihalarining manzilli ro‘yxatdagi obyektlarning loyiha-smeta hujjatlari ishlab chiqilgandan so‘ng ularga ajratilgan mablag‘lar yetishmagan taqdirda, ushbu loyihalar bo‘yicha ularni qurish-taʼmirlash va obodonlashtirish bilan bog‘liq qo‘shimcha xarajatlar buyurtmachilarning takliflari asosida Qoraqalpog‘iston Respublikasi Jo‘qorg‘i Kengesi, xalq deputatlari viloyat Kengashlarining qarorlariga asosan tegishliligi bo‘yicha Qoraqalpog‘iston Respublikasi budjeti, viloyatlar mahalliy budjetlarining qo‘shimcha manbalari hisobidan qoplanishi belgilab qo‘yilgan.
Bundan tashqari, Qoraqalpog‘iston Respublikasi Vazirlar Kengashi va viloyat hokimliklari Qoraqalpog‘iston Respublikasi Jo‘qorg‘i Kengesi va xalq deputatlari viloyatlar Kengashlariga mazkur qarorda nazarda tutilgan chora-tadbirlarni Qoraqalpog‘iston Respublikasi va viloyatlar mahalliy budjetlarining qo‘shimcha manbalari hisobidan moliyalashtirish yuzasidan takliflar kiritib borishi ham qayd etilgan.
Izoh (0)