Ichki ishlar vazirining matbuot kotibi Shohrux G‘iyosov Toshkent shahrida bir guruh yoshlar qo‘lga olinib, idoraga olib ketilgani aytilgan xabarlarga munosabat bildirdi.
Telegram’dagi “Potrebitel.uz” kanalining yozishicha, 5-mart kuni poytaxtda bir guruh voyaga yetmagan yoshlar ushlanib, ikkita avtobusda idoraga olib ketilgan. “Yoshlar urishmagan, janjallashmagan, shunchaki sayr qilib yurgan”, — deb yozadi kanal.
G‘iyosovning yozishicha, Yashnobod tumani Istiqlol ko‘chasida joylashgan Xalqaro forumlar saroyi yaqinida 5-mart kuni “Ryodan” xalqaro yoshlar harakatiga o‘xshash submadaniyatga qo‘shilishni targ‘ib qiluvchi turli shiorlarni aytgan holda harakatlangan 50 ga yaqin yoshlar to‘plangan.
Bundan oldin Toshkent shahar Ichki ishlar bosh boshqarmasi “Ryodan” xalqaro yoshlar harakatining muxlislari O‘zbekistonda ham borligi haqida ogohlantirgan edi.
Natijada 5-mart kuni jamoat tartibining buzilishiga yo‘l qo‘ymaslik maqsadida poytaxt IIBB tomonidan profilaktika tadbirlari olib borilib, ota-onalar va hodisa ishtirokchilari bilan suhbatlar o‘tkazilgan.
“Buzg‘unchi kuchlarning yoshlarimizga ta’siriga isbot sifatida harakat ishtirokchilarida aniqlangan ‘Salom, bugun soat 18:00 da butun forumni... buzamiz. Pnevmatik, sovuq va jangovar qurollar bilan tish-tirnog‘imizgacha qurollanamiz’ kabi chaqiruvlarini keltiramiz. Shuningdek, ijtimoiy tarmoqlarda huquqni muhofaza qilish organlarining harakatlarini obro‘sizlantirishga urinishlar bilan anonim foydalanuvchilarning videolari tarqatilgan. Ota-onalarga farzandlari nima bilan mashg‘ul bo‘layotganiga e’tibor berish kerakligini eslatamiz”, — deyiladi munosabatda.
Izoh (0)