Шавкат Мирзиёев 2 март куни Боку шаҳрида Қўшилмаслик ҳаракати Мулоқот гуруҳининг саммитида нутқ сўзлаб, унда Афғонистондаги вазиятга ҳам эътибор қаратди.
Президент ўз нутқида пандемиядан кейинги даврда геосиёсий ва мафкуравий зиддиятлар кучайиб, уларнинг таъсирида жаҳоннинг турли нуқталарида янги нотинчлик ўчоқлари пайдо бўлаётгани барчани жиддий ташвишга солаётганини қайд этди.
“Бундан ташқари, Яқин Шарқ минтақаси ва Афғонистонда узоқ вақтдан буён сақланиб қолаётган низоларнинг глобал ечими ҳанузгача топилгани йўқ.
Айниқса, сўнгги пайтларда барча давлатларда ўсиб бораётган терроризм ва экстремизмнинг хавф-ҳатарига қарши Ташкилот доирасида амалий алоқаларни кучайтириш тобора долзарб тус олаётганини алоҳида таъкидламоқчиман”, — деди давлат раҳбари.
Шавкат Мирзиёев шундай таҳликали вазиятда Қўшилмаслик ҳаракатини терроризмнинг ҳар қандай кўринишига қарши курашнинг халқаро-ҳуқуқий базасини мустаҳкамлаш бўйича умумий интилишларга етакчилик қилишга чақирди.
“Ушбу жараёнда ҳаракатга аъзо барча давлатларнинг БМТ доирасида кўп томонлама ҳамкорликни янада фаоллаштиришига қатъий ишонамиз. Шунингдек, бу муаммоларни халқаро миқёсда самарали ҳал этиш ва тизимли мувофиқлаштиришда БМТ ва унинг ихт́исослашган тузилмалари, албатта, асосий ролни бажариши лозим”, — деди давлат раҳбари.
Президент БМТни ислоҳ қилиш жараёнида Хавфсизлик кенгаши таркибида келгусида Қўшилмаслик ҳаракати аъзоларининг доимий ўрни бўлиши кераклигини айтди.
“Шу ўринда афғон масаласи бўйича алгоритмни келишиш учун БМТ ҳузурида Халқаро музокаралар гуруҳини тузишга доир Ўзбекистон таклифини қўллаб-қувватлайсизлар, деб ишонаман”, — деди Шавкат Мирзиёев.
Эслатиб ўтамиз, Ўзбекистон президенти 2022 йилнинг октябрида Осиёда ҳамкорлик ва ишонч чоралари бўйича кенгашнинг VI саммитида мамлакат халқаро террористик марказга айланиб қолмаслиги учун Афғонистондаги вазиятни тартибга солиш ва у ерда тинч ҳаётни тиклаш муҳимлигини қайд этганди.
Шавкат Мирзиёев Афғонистон муваққат ҳукумати билан ўзаро ҳамкорлик бўйича умумий, мувофиқлашган ёндашувларни ишлаб чиқиш зарурлигини таъкидлади. У Афғонистон ҳукумати билан томонлар мажбуриятларини босқичма-босқич бажариш алгоритмини тайёрлаш ва келишиш учун юқори даражадаги халқаро музокаралар гуруҳини тузиш ташаббуси билан Осиё давлатларининг БМТ Бош Ассамблеясига қўшма мурожаати имкониятини кўриб чиқишни таклиф қилганди.
Изоҳ (0)