“Davlat ishtirokidagi korxonalarni isloh qilish jarayonlarini jadallashtirish chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga ko‘ra, 2023–2025-yillarda isloh qilinadigan va operatsion samaradorligi oshiriladigan davlat ishtirokidagi yirik korxonalar (31 ta) ro‘yxati tasdiqlandi. Xususan, ro‘yxatdan “O‘zavtosanoat” (100 foiz), Navoiy OKM (davlat ulushi 100 foiz), “O‘zmetkombinat (81,1 foiz), “O‘zbekneftgaz” (99,9 foiz), “O‘ztransgaz” (99,5 foiz), Uzbekistan Airways (100 foiz), “O‘zbekko‘mir” (97,9 foiz) kabi kompaniyalar o‘rin olgan.
Mazkur korxonalar ustav kapitalidagi davlat aksiya paketlari (ulushlari) UzAssets investitsiya kompaniyasi boshqaruviga beriladi.
UzAssets investitsiya kompaniyasiga, jumladan, quyidagi qo‘shimcha vazifalar yuklatildi:
- iqtisodiyot uchun muhim ahamiyatga ega yirik korxonalarni isloh qilish, shu jumladan, ekologik, ijtimoiy va korporativ boshqaruv (ESG) tamoyillarini joriy etish hamda xususiy sektorni jalb qilish;
- korxonalarning rentabelligi va operatsion samaradorligini oshirish, moliyaviy barqarorligini taʼminlash hamda biznes-jarayonlarni optimallashtirish;
- boshqaruvga berilgan korxonalarning samarali boshqarilishini va barqaror rivojlanishini taʼminlash;
- qarorga ko‘ra, Davlat aktivlarini boshqarish agentligi, tegishli vazirlik va idoralarning o‘zlariga tegishli aksiya paketlari (ulushlari) Strategik islohotlar agentligiga o‘tkaziladi.
2023-yil 1-iyulgacha UzAssets investitsiya kompaniyasi tomonidan unga boshqaruvga berilgan korxonalarning biznes-rejalari qayta ko‘rib chiqiladi.
Ma’lumot uchun, UzAssets investitsiya kompaniyasi Vazirlar Mahkamasining 2020-yil 15-iyundagi 381-sonli qaroriga muvofiq tashkil etilgan. UzAssets kompaniyasining asosiy maqsadi — davlat ulushi mavjud bo‘lgan korxonalarni sotish jarayoniga tayyorgarlik ishlarini tashkil etish hamda xalqaro standartlarga asosan yirik davlat korxonalarini sotish bo‘yicha investorlar bilan muzokaralar olib borish. Kompaniyaning yagona aksiyadori — Davlat aktivlarini boshqarish agentligi hisoblanib, davlat ulushi mavjud bo‘lgan yirik korxonalarni sotish va ularni birlashtirish yuzasidan xalqaro tajribani o‘rganish, amalda qo'llash va tajribalarni yig‘ish bo‘yicha agentlikka platforma bo‘lib xizmat qiladi.
Eslatib o‘tamiz, 2022-yilning 11 oyida O‘zbekistonda 82 mingdan ortiq yangi korxonalar tashkil etilgan. Ularning eng ko‘pi Samarqand (9 332), Farg‘ona (7 951), Qashqadaryo (7 470), Toshkent (6 325), Xorazm (5 240) viloyatlarida va Toshkent (14 408) shahrida ro‘yxatga olingan.
Izoh (0)