Qoraqalpog‘istonda o‘qituvchilardan “komissiya” uchun pul yiqqan direktor ishdan bo‘shadi

Qoraqalpog‘iston Respublikasi prokuraturasi ijtimoiy tarmoqlarda Xo‘jayli tumanidagi 21-sonli umumtaʼlim maktabi direktori xodimlardan pul yig‘ayotgani aytilgan xabarlarga munosabat bildirdi.

Ijtimoiy tarmoqlarda Xo‘jayli tumanidagi 21-sonli umumtaʼlim maktabi direktori P.A. Toshkent shahrida bo‘la turib, “komissiya uchun” degan bahona bilan o‘qituvchi va texnik xodimlardan 20 ming so‘mdan pul yig‘dirgani haqida xabarlar tarqaldi. Mazkur holat bo‘yicha shu kunning o‘zida Xo‘jayli tumani prokuraturasi tomonidan tergovga qadar tekshiruv harakatlari boshlangan.

Aniqlanishicha, 10-fevral kuni 21-maktabning direktori P.A.ning topshirig‘iga asosan, maktab o‘qituvchisi D.R. 16 nafar o‘qituvchidan 320 ming so‘m yig‘ib olib, direktorga bergan. Direktor P.A.ning o‘zi esa 18 nafar o‘qituvchidan 360 ming so‘m yig‘ib olgan. 

Maktab direktori P.A. o‘z ko‘rsatmasida ushbu pullar maktabdagi bannerlarni yangisiga almashtirish uchun yig‘ilganini, yig‘ilgan pullar amalda hech qayerga ishlatilmasdan, o‘qituvchilarga yana qaytarib berilganini bildirgan.

Bir guruh o‘qituvchilar pul yig‘ilish sabablari haqida P.A. bergan ko‘rsatmalarni tasdiqlagan bo‘lsa, bir guruhi pullar kelgan komissiyani tushlikda ovqatlantirish bahonasida yig‘ilganini bayon qilgan.

24-fevral kuni P.A. o‘z ixtiyori bilan ishdan bo‘shash haqida arizasiga binoan lavozimidan ozod qilingan.

“Hozirda tergovga qadar tekshiruv davom etmoqda, natijasiga ko‘ra qonuniy qaror qabul qilinishi taʼminlanadi”, — deyiladi xabarda.

Eslatib o‘tamiz, 2021-yil iyulda Andijon viloyati Bo‘ston tumanidagi 25-sonli umumta’lim maktabida tekshiruvlar uchun 100 dollardan pul yig‘ilgani haqida audioyozuv ijtimoiy tarmoqlarda tarqalgandi. Mazkur holatni atroflicha o‘rganish maqsadida viloyat Xalq ta’limi boshqarmasi tomonidan ishchi guruh faoliyati yo‘lga qo‘yilgandi. Maktab direktoriga nisbatan esa intizomiy jazo chorasi ko‘rilgan. Biroq Andijon viloyati Xalq ta’limi boshqarmasi mazkur holat bo‘yicha maktab direktoriga ko‘rilgan choraga qanoatlanmay, maktab rahbarini lavozimidan olishga qaror qilgan edi.