Қорақалпоғистон Республикаси прокуратураси ижтимоий тармоқларда Хўжайли туманидаги 21-сонли умумтаълим мактаби директори ходимлардан пул йиғаётгани айтилган хабарларга муносабат билдирди.
Ижтимоий тармоқларда Хўжайли туманидаги 21-сонли умумтаълим мактаби директори П.А. Тошкент шаҳрида бўла туриб, “комиссия учун” деган баҳона билан ўқитувчи ва техник ходимлардан 20 минг сўмдан пул йиғдиргани ҳақида хабарлар тарқалди. Мазкур ҳолат бўйича шу куннинг ўзида Хўжайли тумани прокуратураси томонидан терговга қадар текширув ҳаракатлари бошланган.
Аниқланишича, 10 февраль куни 21-мактабнинг директори П.А.нинг топшириғига асосан, мактаб ўқитувчиси Д.Р. 16 нафар ўқитувчидан 320 минг сўм йиғиб олиб, директорга берган. Директор П.А.нинг ўзи эса 18 нафар ўқитувчидан 360 минг сўм йиғиб олган.
Мактаб директори П.А. ўз кўрсатмасида ушбу пуллар мактабдаги баннерларни янгисига алмаштириш учун йиғилганини, йиғилган пуллар амалда ҳеч қаерга ишлатилмасдан, ўқитувчиларга яна қайтариб берилганини билдирган.
Бир гуруҳ ўқитувчилар пул йиғилиш сабаблари ҳақида П.А. берган кўрсатмаларни тасдиқлаган бўлса, бир гуруҳи пуллар келган комиссияни тушликда овқатлантириш баҳонасида йиғилганини баён қилган.
24 февраль куни П.А. ўз ихтиёри билан ишдан бўшаш ҳақида аризасига биноан лавозимидан озод қилинган.
“Ҳозирда терговга қадар текширув давом этмоқда, натижасига кўра қонуний қарор қабул қилиниши таъминланади”, — дейилади хабарда.
Эслатиб ўтамиз, 2021 йил июлда Андижон вилояти Бўстон туманидаги 25-сонли умумтаълим мактабида текширувлар учун 100 доллардан пул йиғилгани ҳақида аудиоёзув ижтимоий тармоқларда тарқалганди. Мазкур ҳолатни атрофлича ўрганиш мақсадида вилоят Халқ таълими бошқармаси томонидан ишчи гуруҳ фаолияти йўлга қўйилганди. Мактаб директорига нисбатан эса интизомий жазо чораси кўрилган. Бироқ Андижон вилояти Халқ таълими бошқармаси мазкур ҳолат бўйича мактаб директорига кўрилган чорага қаноатланмай, мактаб раҳбарини лавозимидан олишга қарор қилган эди.
Изоҳ (0)