Навоий, Фарғона, Андижон, Самарқандда газ ва электр энергиясидан ноқонуний фойдаланганлар 2,5 миллиард сўмдан зиёд зарар етказди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, бош прокуратура ҳузуридаги департаментнинг Навоий вилоят бошқармаси томонидан “Ҳудудгаз Навоий” газ таъминоти филиали ходимлари билан ҳамкорликда ўтказилган терговга қадар текширувда, Қизилтепа туманидаги “Ш.Д.” МЧЖ масъул шахслари корхона иссиқхонасига ўрнатилган электрон газ ҳисоблагичга ташқи томондан шикаст етказиб, жами 950,4 миллион сўмлик табиий газдан ноқонуний фойдалангани аниқланган.
Шунингдек, департаментнинг Марғилон шаҳар бўлими томонидан ўтказилган терговга қадар текширувда, Марғилон шаҳар ЭТК масъул шахслари ўз хизмат вазифаларига совуққонлик билан қарагани оқибатида, “Э.B.” унитар корхонасидаги 3 та электр ҳисоблагич рўйхатдан ўтказилмасдан қолиб, жами 684,6 миллион сўмлик электр энергиясидан ноқонуний фойдаланилгани аниқланган.
Департаментнинг Андижон шаҳар бўлими томонидан вилоят ДХХ ходимлари билан ҳамкорликда ўтказилган тадбирда, “И.п.” МЧЖ масъул шахслари корхонанинг ишлаб чиқариш цехидаги электр ҳисоблагичга ташқи таъсир ўтказиб, жами 682,1 миллион сўмлик электр энергиясидан ноқонуний фойдалангани аниқланган.
Департаментнинг Жалақудуқ туман бўлими томонидан ЭТК ходимлари билан ҳамкорликда ўтказилган терговга қадар текширувда, “Б.с.” МЧЖ масъул шахслари МЧЖга қарашли тошни қайта ишлаш цехида умумий фойдаланишдаги электр тармоғига ўзбошимчалик билан уланиб, жами 238,1 миллион сўмлик электр энергиясидан ноқонуний фойдалангани аниқланган.
Шу каби, департаментнинг Бўстон тумани бўлими томонидан ЭТК ходимлари билан ҳамкорликда ўтказилган терговга қадар текширувда, “О.А.” фермер хўжалиги масъул шахслари хўжалик чорва биносини умумий фойдаланишдаги электр тармоғига ўзбошимчалик билан улаб, жами 210,6 миллион сўмлик электр энергиясидан ноқонуний фойдалангани аниқланган.
Департаментнинг Каттақўрғон туман бўлими томонидан ЭТК ходимлари билан ҳамкорликда ўтказилган терговга қадар текширувда эса, фуқаро М.Ш. паррандачилик фермасидаги электр ҳисоблагичнинг ҳимоя қопқоқларини бузиб, ташқи таъсир кўрсатиб, жами 109,9 миллион сўмлик электр энергиясидан ноқонуний фойдалангани аниқланган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) ва 207-моддаси (мансабга совуққонлик билан қараш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)