O‘zbekiston Professional futbol ligasi bosh direktori Diyor Imomxo‘jayev “Andijon” klubi bilan bog‘liq vaziyat haqida gapirdi.
“So‘nggi haftada tishimizni tishimizga qo‘yib chidadik. Berilgan va’dalar va’daligicha qolib ketdi. 2 yil oldin tadbirkor Jur’at Quvvatov hali klubni qabul qilib olmasdan turib, biz u kishi va hokimiyat vakillari bilan ko‘rishganmiz. Faqatgina viloyatning pulini yeydigan jamoadan ko‘ra, boshqa jamoa, hozirgi “Andijon-SGS”ga e’tibor qaratish kerak deganmiz. O‘sha paytlar bu jamoa “Andijon-2” sifatida faoliyat yuritardi. Lekin hokimiyatdagilar viloyat obro‘si tushib ketadi, nima qilib bo‘lsa ham “Andijon”ni ushlab qolamiz deyishgan edi.
Natijada tadbirkor oxirgi 2 yilda klubni avvalgi qarzlarini to‘lashga majbur bo‘ldi. Bizda futbol klubiga kimdir keladi, katta qarzga botirib ketadi, keyingi kelgan odam esa futbolni rivojlantirishga emas eski kamchiliklarni to‘g‘rilashga vaqt sarflaydi. Quvvatov o‘sha qarzlarga sarflagan pullarini stadion va projektorga ishlatishga tayyor edi boshida. Agar shu ishlarni qilganda, bugun “Andijon”da yaxshi stadion ham bo‘lardi, projektorlar ham bo‘lardi.
“Andijon-SGS” 4,5 milliardga jamoa tashkil qildi. Katta “Andijon”ni budjeti esa 36 milliard. “Andijon-SGS” 4,5 milliardni hukumatdan olmaydi, o‘zi topadi. “Andijon”ni shu yil legionerlarga sarflagan puli 6 milliardni tashkil etadi. U klub esa kichik budjet bilan 30-35 nafar akademiyadan chiqqan yigitlarga tayanib, katta maqsad qo‘ygan.
Masalan, “Andijon” “Istiqlol” stadionida o‘ynaydi-a? Shu stadion bilan birinchi bo‘lim kim kelishdi? “Andijon-SGS” kelishgan. Shundan keyin “Andijon” klubi ularning ustiga borib, biz viloyatning katta jamoasimiz, biz stadionda o‘ynaymiz dedi. Bunaqa bo‘lishi kerak emas.
“Andijon-SGS”dagi yosh yigitlar ertaga viloyat jamoasiga, o‘zbek futboliga foydasi tegishiga ishonaman”, — Diyor Imomxo‘jayev.
Izoh (0)