Toshkent shahar Chilonzor tumanida 150 nafarga yaqin voyaga yetmaganlarni yig‘ib, jamoat tartibini buzgan bloger yigit qo‘lga olindi. Bu haqda shahar Ichki ishlar bosh boshqarmasi axborot xizmati xabar berdi.
Xabarga ko‘ra, 24-fevral kuni taxminan soat 15:30 larda, ijtimoiy tarmoqlarda o‘z blogini yurituvchi yutuber — 2004-yilda tug‘ilgan, Jizzax viloyatida yashovchi Aslambek Bahromov Chilonzor tumanidagi Magic City ko‘ngilochar maskani yaqinidagi avtoturargoh oldida fan klub aʼzolarini chaqirib, ular bilan uchrashuv o‘tkazmoqchi bo‘lgan va ularga sovg‘alar tarqatishini bildirgan.
Uchrashuvga taxminan 130-140 nafarga yaqin voyaga yetmagan bolalar yig‘ilgan va jamoat tartibini buzib, shovqin-suron ko‘targan. Shu hududda xizmat olib boruvchi Milliy gvardiya va ichki ishlar organlari xodimlari tartibsizlikning oldini olish va tushuntirish ishlarini olib borish maqsadida A.B.ni ichki ishlar bo‘limiga olib ketgan. Xodimlar uni olib ketayotgan vaqtida bir nechta voyaga yetmaganlar uning ketidan avtomashinagacha kuzatib borgan. So‘ng uchrashuvga yig‘ilganlarning barchasi tarqalgan.
Mazkur holat yuzasidan Chilonzor tumani IIO FMB tomonidan A.B.ga nisbatan Maʼmuriy javobgarlik to‘g‘risidagi kodeksning 201-moddasi (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) bilan maʼmuriy bayonnoma rasmiylashtirildi. Hujjatlar o‘rnatilgan tartibda ko‘rib chiqish uchun tuman sudiga taqdim etiladi.
Izoh (0)