Тошкент шаҳар Чилонзор туманида 150 нафарга яқин вояга етмаганларни йиғиб, жамоат тартибини бузган блогер йигит қўлга олинди. Бу ҳақда шаҳар Ички ишлар бош бошқармаси ахборот хизмати хабар берди.
Хабарга кўра, 24 февраль куни тахминан соат 15:30 ларда, ижтимоий тармоқларда ўз блогини юритувчи ютубер — 2004 йилда туғилган, Жиззах вилоятида яшовчи Асламбек Баҳромов Чилонзор туманидаги Magic City кўнгилочар маскани яқинидаги автотураргоҳ олдида фан клуб аъзоларини чақириб, улар билан учрашув ўтказмоқчи бўлган ва уларга совғалар тарқатишини билдирган.
Учрашувга тахминан 130-140 нафарга яқин вояга етмаган болалар йиғилган ва жамоат тартибини бузиб, шовқин-сурон кўтарган. Шу ҳудудда хизмат олиб борувчи Миллий гвардия ва ички ишлар органлари ходимлари тартибсизликнинг олдини олиш ва тушунтириш ишларини олиб бориш мақсадида А.Б.ни ички ишлар бўлимига олиб кетган. Ходимлар уни олиб кетаётган вақтида бир нечта вояга етмаганлар унинг кетидан автомашинагача кузатиб борган. Сўнг учрашувга йиғилганларнинг барчаси тарқалган.
Мазкур ҳолат юзасидан Чилонзор тумани ИИО ФМБ томонидан А.Б.га нисбатан Маъмурий жавобгарлик тўғрисидаги кодекснинг 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) билан маъмурий баённома расмийлаштирилди. Ҳужжатлар ўрнатилган тартибда кўриб чиқиш учун туман судига тақдим этилади.
Изоҳ (0)