AQSH prezidenti Jo Baydenga Ukrainaga yordam takliflarini maʼqullatish oldingiga qaraganda qiyinlashgan. Bu haqda “Amerika ovozi” teleradiosi muxbiri, jurnalist Navbahor Imomova “Daryo” nashriga bergan intervyusida aytdi.
Navbahor Imomovaning ta’kidlashicha, masala ayni paytda Vakillar palatasida respublikachilar ko‘pchilik o‘ringa egaligi bilan bog‘liq.
“Agar muxolifatning, yaʼni respublikachilar – prezident Baydenning ashaddiy tanqidchilarining fikriga quloq solsak, ular Ukrainani qo‘llab-quvvatlamasligimiz kerak, demaydi. “Ukrainani quvvatlashimiz lozim, Rossiya — agressor. U haqiqatan ham Ukraina hududini bosib olgan”, deb aytishadi. Lekin yordam qanday berilayotganiga qarshiliklar bor. Yaʼni Ukrainaga yordamlar shartsiz bo‘lmasligi kerak, deyishadi. “Ukraina qaysidir jihatdan Qo‘shma Shtatlarga boqimanda bo‘lib qolmasligi, qadamini o‘ylab bosishi, qo‘shnisi bilan kelishib olishga harakat qilishi, yetti o‘lchab, bir kesishi zarur. G‘arbga suyanib olmasligi lozim. Dunyoning bu beqaror hududida bizga yana bir tobe davlat kerak emas, degan dashnomlar yangrab turadi. Norozilar deganda shularni nazarda tutyapman.
Hozirda respublikachilar Vakillar palatasida ko‘pchilik o‘ringa ega ekan, Baydenga Ukrainaga yordam takliflarini maʼqullatish oldingiga qaraganda qiyinlashgan. O‘tgan bir yil ichida demokratlar Vakillar palatasida hukmron edi. Bu ishlar tez-tez bitayotgandi. Hozirga kelib, Vakillar palatasi respublikachilar qo‘lida. Bu respublikachilarni ishontira olish uchun Oq uy endi ko‘proq ter to‘kishi kerak bo‘ladi, degani”, – dedi jurnalist.
Navbahor Imomovaning qo‘shimcha qilishicha, AQSH siyosiy organlari orasida Ukrainani qo‘llab-quvvatlash bo‘yicha yakdillik bor.
“Amerika ommasi orasida biz Ukraina tarafdorimiz, Zelenskiyni quvvatlashimiz kerak. Rossiya birinchi navbatda Ukrainaning bosib olingan hududlaridan chiqib ketishi, mamlakat suvereniteti taʼminlanishi shart. Ikkinchi navbatda, Ukrainaning qayta tiklanishi uchun zarur yordamlarni berishimiz lozim, degan qarash kuchli. Kuzatishimizcha, bu qarshilarga qaraganda ustunroq.
AQSH siyosiy organlari, aynan Oq uy, Davlat departamenti, Pentagon va Kongress orasida Ukrainani qo‘llab-quvvatlash bo‘yicha yakdillik bor”, – dedi “Amerika ovozi” muxbiri.
Avvalroq 20-fevral kuni Jo Bayden Kiyevga borgani va Ukraina prezidenti Vladimir Zelenskiy bilan uchrashgani xabar qilingandi. Amerika rahbari tashrifi davomida Ukraina AQSHdan yangi 500 million dollarlik harbiy yordam olishini aytgan.
Izoh (0)