АҚШ президенти Жо Байденга Украинага ёрдам таклифларини маъқуллатиш олдингига қараганда қийинлашган. Бу ҳақда “Америка овози” телерадиоси мухбири, журналист Навбаҳор Имомова “Дарё” нашрига берган интервьюсида айтди.
Навбаҳор Имомованинг таъкидлашича, масала айни пайтда Вакиллар палатасида республикачилар кўпчилик ўринга эгалиги билан боғлиқ.
“Агар мухолифатнинг, яъни республикачилар – президент Байденнинг ашаддий танқидчиларининг фикрига қулоқ солсак, улар Украинани қўллаб-қувватламаслигимиз керак, демайди. “Украинани қувватлашимиз лозим, Россия — агрессор. У ҳақиқатан ҳам Украина ҳудудини босиб олган”, деб айтишади. Лекин ёрдам қандай берилаётганига қаршиликлар бор. Яъни Украинага ёрдамлар шартсиз бўлмаслиги керак, дейишади. “Украина қайсидир жиҳатдан Қўшма Штатларга боқиманда бўлиб қолмаслиги, қадамини ўйлаб босиши, қўшниси билан келишиб олишга ҳаракат қилиши, етти ўлчаб, бир кесиши зарур. Ғарбга суяниб олмаслиги лозим. Дунёнинг бу беқарор ҳудудида бизга яна бир тобе давлат керак эмас, деган дашномлар янграб туради. Норозилар деганда шуларни назарда тутяпман.
Ҳозирда республикачилар Вакиллар палатасида кўпчилик ўринга эга экан, Байденга Украинага ёрдам таклифларини маъқуллатиш олдингига қараганда қийинлашган. Ўтган бир йил ичида демократлар Вакиллар палатасида ҳукмрон эди. Бу ишлар тез-тез битаётганди. Ҳозирга келиб, Вакиллар палатаси республикачилар қўлида. Бу республикачиларни ишонтира олиш учун Оқ уй энди кўпроқ тер тўкиши керак бўлади, дегани”, – деди журналист.
Навбаҳор Имомованинг қўшимча қилишича, АҚШ сиёсий органлари орасида Украинани қўллаб-қувватлаш бўйича якдиллик бор.
“Америка оммаси орасида биз Украина тарафдоримиз, Зеленскийни қувватлашимиз керак. Россия биринчи навбатда Украинанинг босиб олинган ҳудудларидан чиқиб кетиши, мамлакат суверенитети таъминланиши шарт. Иккинчи навбатда, Украинанинг қайта тикланиши учун зарур ёрдамларни беришимиз лозим, деган қараш кучли. Кузатишимизча, бу қаршиларга қараганда устунроқ.
АҚШ сиёсий органлари, айнан Оқ уй, Давлат департаменти, Пентагон ва Конгресс орасида Украинани қўллаб-қувватлаш бўйича якдиллик бор”, – деди “Америка овози” мухбири.
Аввалроқ 20 февраль куни Жо Байден Киевга боргани ва Украина президенти Владимир Зеленский билан учрашгани хабар қилинганди. Америка раҳбари ташрифи давомида Украина АҚШдан янги 500 миллион долларлик ҳарбий ёрдам олишини айтган.
Изоҳ (0)