Navoiy va Jizzax viloyatlarida elektr tarmoqlariga o‘zboshimchalik bilan ulanish holatlari fosh etilmoqda. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Navoiy viloyat boshqarmasi tomonidan boshqa huquqni muhofaza qiliuvchi organlar bilan hamkorlikda tergovga qadar tekshiruv o‘tkazilgan. Unda “N.E.” MCHJ mas’ul shaxslari Navoiy shahrida ko‘p qavatli binoni qurishda hududiy elektr tarmoqlari korxonasi bilan shartnoma tuzmasdan, umumiy foydalanishdagi elektr tarmog‘iga o‘zboshimchalik bilan ulanib, jami 452,4 million so‘mlik elektr energiyasidan noqonuniy foydalangani aniqlangan.
Shuningdek, departamentning Sharof Rashidov tuman bo‘limi tomonidan hududiy elektr tarmoqlari korxonasi xodimlari bilan hamkorlikda tergovga qadar tekshiruv o‘tkazilgan. Unda “J.S.T.” MCHJ tuman filiali mas’ul shaxslari “Fayzobod” mahallasi hududida joylashgan suv uzatish inshootida o‘rnatilgan elektr hisoblagichga zarar yetkazgani aniqlangan. Ular jami 110,4 million so‘mlik elektr energiyasidan noqonuniy foydalangan.
Holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)