Yaponiyadagi Pancho laqabli mushuk g‘amgin ko‘rinishi bilan ijtimoiy tarmoqlarda mashhurlikka erishdi (foto)

Yaponiyada yashovchi melanxolik mushuk g‘amgin ko‘rinishi bilan ijtimoiy tarmoq foydalanuvchilarini hayratda qoldirdi. Mushukni Instagram’da deyarli 100 ming kishi kuzatib boradi.

Daily Mail nashrining yozishicha, Akira ismli Mayzuru shahrida yashovchi fuqaro 13 yil avval ko‘chadagi mushukni uyiga olib kelgan. Akira bir necha yillardan buyon mushukka g‘amxo‘rlik qiladi. Ijtimoiy tarmoq foydalanuvchilari Panchoning g‘ayrioddiy ko‘zlarini yoqtirib qolishdi. Mushuk tashqi ko‘rinishidan qayg‘uli holatda ekanini ko‘rsatayotganga o‘xshaydi.

Mushukning egasi uning tashqi ko‘rinishi aldamchi ekanini, aslida u baxtli va hech qanday azob chekmasligini aytgan.

“Hamma Panchoni yaxshi ko‘radi va u ham atrofdagilar bilan do‘stona munosabatda. Mushuk hamma bilan juda yaxshi til topishadi. U juda erka”, — deydi Akira.