Barbi ishlab chiqaruvchisi skoliozdan aziyat chekayotgan qizlarni ruhlantiruvchi qo‘g‘irchoqni taqdim etdi

Barbi ishlab chiqaruvchisi Mattel kompaniyasi ilk bor skolioz kasalligi bor bo‘lgan qizlarni ruhlantiruvchi qo‘g‘irchoqni taqdim etdi, deb xabar bermoqda “Pravila jizni” nashri.

Yangi qo‘g‘irchoq Chelsi deb ataladi va u Barbining singlisi bo‘ladi. Chelsi umurtqa pog‘onasi egriligidan aziyat chekadi va uni tuzatish uchun maxsus korset kiyadi.

Mattel kompaniyasi vakillari qo‘g‘irchoqni ishlab chiqarishda bolalardagi murakkab umurtqa kasalliklari mutaxassisi, neyroxirurg Lyuk Masissin bilan maslahatlashdi.

Kompaniya yangi mahsulot bolalarda empatiyani rivojlantirishga yordam berishiga va shunga o‘xshash muammolarga duch kelgan insonlar o‘zini qulayroq his qilishiga umid qilmoqda. Shuningdek, skoliozga chalingan bolalar ham korset kiyishdan kamroq uyaladi, deb taxmin qilinmoqda.