Futbol bo‘yicha Konferensiyalar Ligasi doirasida o‘tgan “Trabzonspor” va “Bazel” o‘rtasidagi bahs (1:0) hissiyotlarga boy bo‘ldi. Turkiyada yaqinda bo‘lib o‘tgan zilzilalar oqibatini hech kim unutgani yo‘q.
Bu zilziladan keyin Turkiyada o‘tgan ilk katta o‘yin edi. Chunki fojia tufayli mamlakatdagi chempionat va boshqa ligalar o‘yinlari to‘xtatilgan.
Futbolchilar motam ramzini bildiruvchi bog‘ichlarni taqib maydonga tushdi. Muxlislar ham fojia haqida unutmagan. Tribunalar falokat ro‘y bergan hududlar yozilgan bannerlar bilan to‘ldirildi.
O‘yin boshlangach, gol urgan Yens Larsen jamoadoshlari bilan birga Turkiya bayrog‘ini ko‘targan holda golni nishonladi. Bu nafaqat “Trabzon”ning balki butun Turkiyaning goli edi.
Tribunada turli turk klublarining liboslarini kiygan muxlislar bor edi: “Fenerbahche”, “Beshiktosh”, “Galatasaroy”. Ular birga edi, ular bir-birini quchoqlab turardi — fojia hatto murosaga kelolmaydigan muxlislarni ham birlashtirgandi. “Birodarlik, do‘stlik, birlik” — “Trabzonspor” buni shunday ta’rifladi.
O‘yindan tushgan barcha mablag‘ Turkiya va Suriyadagi jabrlanganlarga yordam berishga yo‘naltirildi. Muxlislar esa bolalar uchun o‘yinchoqlar olib keldi.
O‘yin boshida turkiyalik muxlislar vayronalar ostidan bolani olib chiqqan qutqaruvchi va iskovuch it tasvirlangan bannerni namoyish etdi. Qutqaruvchining yengida esa “rahmat” so‘zi yozilgandi. Vayronalar ostidan esa turk bayrog‘ini ushlagan qo‘l chiqib turibdi.
Qutqaruvchi bosh kiyimida zilzila oqibatlarini bartaraf etishga yordam bergan mamlakatlar bayrog‘i tasviri tushirilgan edi. Ular qatorida O‘zbekiston bayrog‘i ham bor.
Bannerda tasvirlangan it abstrakt emas, haqiqiy qahramon it bo‘lib, uning nomi Proteo. Iskovuch it Qahramonmarashdagi qutqaruv ishlari vaqtida qurbon bo‘ldi.
Proteo Meksikadan tashrif buyurgan qutqaruvchi guruh tarkibida bo‘lgan. Proteo ishchi guruh bilan birgalikda odamlarni izladi, biroq qidiruv paytida uning ustiga bino vayronalari tushdi va it halok bo‘ldi. Mahalliy manbalarning xabar berishicha, Proteo kamida ikki kishini topishda yordam bergan.
Dushanba kuni Meksika qahramon bilan xayrlashdi. “Biz hamrohimiz Proteo nomli itimizni yo‘qotganimizdan qayg‘udamiz. Turkiyadagi birodarlarimiz uchun olib borgan qidiruv-qutqaruv ishlarida Meksika jamoasi tarkibida o‘z burchini bajardi. Qahramonona mehnati uchun rahmat”, — deydi Meksika mudofaa vaziri Luis Kresensio Sandoval.
Turkiyada Proteodan tashqari yana o‘nlab iskovuch itlar xizmat qilmoqda.
Qutqaruvchi itlar vayronalar ostidan odamlarni izlashda juda muhim
Ularning asosiy rolini Turkiyada yordam berayotgan amerikaliklardan biri Mark Kampet ajoyib tasvirlab bergan:
“Ularning uyoqdan buyoqqa yurganini ko‘rishingiz mumkin. U yaqinlashgani sari qidiruv maydoni ham kichrayib boraveradi. Ular boshqa odamlarning hidini eslab qoladi va kim unga kerak yoki kerakmasligini aniqlay oladi. Itlar tirik va o‘liklarni osonroq ajrata oladi”.
Yana bir qahramon itlardan biri — Piter Pen. Bir hafta oldin AQSHdan keltirilgan iskovuch it Turkiyaning janubi-sharqidagi Adiyaman shahrida odamlarning hayotini saqlab qolmoqda. U odam yetib borishi qiyin bo‘lgan joylargacha sudralib borib, o‘z ishini bajarmoqda.
Turkiyada yana ko‘plab itlar qutqaruvchilarga yordam bermoqda. Xususan, o‘zbekistonlik qutqaruvchilar bilan birga Turkiyaga yo‘l olgan itlar ham.
Izoh (0)