Футбол бўйича Конференциялар Лигаси доирасида ўтган “Трабзонспор” ва “Базел” ўртасидаги баҳс (1:0) ҳиссиётларга бой бўлди. Туркияда яқинда бўлиб ўтган зилзилалар оқибатини ҳеч ким унутгани йўқ.
Бу зилзиладан кейин Туркияда ўтган илк катта ўйин эди. Чунки фожиа туфайли мамлакатдаги чемпионат ва бошқа лигалар ўйинлари тўхтатилган.
Футболчилар мотам рамзини билдирувчи боғичларни тақиб майдонга тушди. Мухлислар ҳам фожиа ҳақида унутмаган. Трибуналар фалокат рўй берган ҳудудлар ёзилган баннерлар билан тўлдирилди.
Ўйин бошлангач, гол урган Йенс Ларсен жамоадошлари билан бирга Туркия байроғини кўтарган ҳолда голни нишонлади. Бу нафақат “Трабзон”нинг балки бутун Туркиянинг голи эди.
Трибунада турли турк клубларининг либосларини кийган мухлислар бор эди: “Фенербаҳче”, “Бешиктош”, “Галатасарой”. Улар бирга эди, улар бир-бирини қучоқлаб турарди — фожиа ҳатто муросага келолмайдиган мухлисларни ҳам бирлаштирганди. “Биродарлик, дўстлик, бирлик” — “Трабзонспор” буни шундай таърифлади.
Ўйиндан тушган барча маблағ Туркия ва Суриядаги жабрланганларга ёрдам беришга йўналтирилди. Мухлислар эса болалар учун ўйинчоқлар олиб келди.
Ўйин бошида туркиялик мухлислар вайроналар остидан болани олиб чиққан қутқарувчи ва исковуч ит тасвирланган баннерни намойиш этди. Қутқарувчининг енгида эса “раҳмат” сўзи ёзилганди. Вайроналар остидан эса турк байроғини ушлаган қўл чиқиб турибди.
Қутқарувчи бош кийимида зилзила оқибатларини бартараф этишга ёрдам берган мамлакатлар байроғи тасвири туширилган эди. Улар қаторида Ўзбекистон байроғи ҳам бор.
Баннерда тасвирланган ит абстракт эмас, ҳақиқий қаҳрамон ит бўлиб, унинг номи Протео. Исковуч ит Қаҳрамонмарашдаги қутқарув ишлари вақтида қурбон бўлди.
Протео Мексикадан ташриф буюрган қутқарувчи гуруҳ таркибида бўлган. Протео ишчи гуруҳ билан биргаликда одамларни излади, бироқ қидирув пайтида унинг устига бино вайроналари тушди ва ит ҳалок бўлди. Маҳаллий манбаларнинг хабар беришича, Протео камида икки кишини топишда ёрдам берган.
Душанба куни Мексика қаҳрамон билан хайрлашди. “Биз ҳамроҳимиз Протео номли итимизни йўқотганимиздан қайғудамиз. Туркиядаги биродарларимиз учун олиб борган қидирув-қутқарув ишларида Мексика жамоаси таркибида ўз бурчини бажарди. Қаҳрамонона меҳнати учун раҳмат”, — дейди Мексика мудофаа вазири Луис Кресенсио Сандовал.
Туркияда Протеодан ташқари яна ўнлаб исковуч итлар хизмат қилмоқда.
Қутқарувчи итлар вайроналар остидан одамларни излашда жуда муҳим
Уларнинг асосий ролини Туркияда ёрдам бераётган америкаликлардан бири Марк Кампет ажойиб тасвирлаб берган:
“Уларнинг уёқдан буёққа юрганини кўришингиз мумкин. У яқинлашгани сари қидирув майдони ҳам кичрайиб бораверади. Улар бошқа одамларнинг ҳидини эслаб қолади ва ким унга керак ёки керакмаслигини аниқлай олади. Итлар тирик ва ўликларни осонроқ ажрата олади”.
Яна бир қаҳрамон итлардан бири — Питер Пен. Бир ҳафта олдин АҚШдан келтирилган исковуч ит Туркиянинг жануби-шарқидаги Адияман шаҳрида одамларнинг ҳаётини сақлаб қолмоқда. У одам етиб бориши қийин бўлган жойларгача судралиб бориб, ўз ишини бажармоқда.
Туркияда яна кўплаб итлар қутқарувчиларга ёрдам бермоқда. Хусусан, ўзбекистонлик қутқарувчилар билан бирга Туркияга йўл олган итлар ҳам.
Изоҳ (0)