Turkiyadagi umumiy — ham prezidentlik, ham parlament saylovlari olti oydan bir yilgacha kechiktirilishi mumkin. Bu haqda Turkiyaning Haberturk nashrida chop etilgan maqolada aytilmoqda.
Maqola mualliflari taʼkidlaganidek, mamlakatdagi hukmron partiya keng ko‘lamli zilzila fonida bu masalaga jiddiy yondashmoqda.
“Saylov bo‘yicha qaror qabul qilinadi. Shundan so‘ng Oliy saylov komissiyasi zilzila oqibatlari tufayli to‘rtta viloyatda to‘liq va oltita viloyatda qisman saylov o‘tkazish amalda imkonsiz bo‘lib qolganini maʼlum qiladi va saylovni boshqa muddatga qoldirishni so‘raydi”, — deyilgan maqolada.
Nashrning xabar berishicha, saylovni keyinga qoldirish kun tartibiga qo‘yilgan, chunki zilzila bilan bog‘liq mavjud vaziyat hozirdanoq saylov jarayonini hukumat uchun mutlaqo salbiy tomonga o‘zgartirgan.
Maqola muallifi Fotiha Oltayli taʼkidlaganidek, saylovlarni keyinga qoldirish uchun hokimiyat Konstitutsiyaviy sudning xuddi shunday vaziyat bo‘yicha eski qarorlaridan birini qo‘llaydi.
Avvalroq Turkiya prezidenti Rajab Toyyib Erdo‘g‘on mamlakatda umumiy saylovlar 2023-yilning 14-mayida o‘tkazilishini, bu aslida belgilangan muddatdan bir oy oldin ekanini aytgandi.
Eslatib o‘tamiz, 6-fevral kuni Turkiyaning janubi-sharqiy qismida ikkita kuchli zilzila sodir bo‘ldi, Suriyaning bir qancha viloyatlariga ham taʼsir qildi. Qurbonlar soni allaqachon 34 ming kishidan oshdi. Qutqaruv ishlari davom etmoqda. BMT ma’lumotlariga ko‘ra, qurbonlar soni 50 ming kishidan ortib ketishi mumkin.
Izoh (0)