Ukraina jangovar harakatlarda “katta miqdordagi o‘q-dorilardan” foydalanmoqda. Buyuk Britaniya esa ukrainalik harbiylarni o‘qitishda ularga NATOga a’zo mamlakatlar armiyasiga xos tarzda snaryadlardan tejamkorlik bilan foydalanishni o‘rgatishga urinmoqda. Bu haqda Britaniya mudofaa vaziri Ben Uolles Times Radio efirida ma’lum qildi, video radiostansiyaning YouTube kanaliga chiqarildi.
“Rus yoki sovetcha jang usuli — bu juda og‘ir o‘q-dorilar bilan artilleriyadan ommaviy o‘qqa tutishni bildiradi. Biz G‘arbda va NATOda hech qachon bunday tarzda jang qilmaymiz. Ularni G‘arb uslubidagi jangga o‘rgatyapmiz”, — dedi Uolles.
Ukraina rasmiylari ham o‘q-dorilar ko‘p ishlatilayotgani haqida gapirib, bu vaziyatni janglarning shiddati bilan izohlagandi — fevral oyi boshida Ukraina prezidenti ofisi vakili snaryadlar deyarli qolmaganini aytgan. Ukraina Qurolli kuchlari kuniga 5—6 ming o‘q-doridan foydalanmoqda — bu kichikroq Yevropa davlatining tinchlik davrida bir yilda ishlab chiqaradigan snaryadlari miqdoriga teng, deb ta’kidlaydi Financial Times. Yevropa ishlab chiqaruvchilari ortib borayotgan talabni qondirish va zavodlarni zudlik bilan kengaytirish zaruriyatidagi muammolarga duch kelmoqda, deb yozadi gazeta.
AQSH ham snaryadlarni Ukrainaga yetkazib berayotgani sababli o‘q-dorilar tanqisligini boshdan kechirmoqda, birinchi navbatda, gap 155 millimetrli artilleriya qurollari va Stinger ko‘chma zenit tizimlari uchun o‘q-dorilar haqida ketmoqda. Kelgusi ikki yil ichida Pentagon snaryadlar ishlab chiqarishni 500 foizga oshirib, o‘q-dorilar ishlab chiqarishni Koreya urushi darajasiga yetkazmoqchi, deb xabar bergandi The New York Times.
Izoh (0)