Жиззах, Самарқанд ва Бухоро вилоятларида 462 миллион сўмдан ортиқ қалбаки пулларни тайёрлаган фуқаролар қўлга олинди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, Жиззах вилояти Пахтакор туманида 3 февраль куни ИИО ходимлари қалбаки пулларни муомалага киритаётганларни қўлга олди. Номаълум шахс томонидан 4 300 000 сўм миқдордаги қалбаки пулни Paynet орқали банк пластик картасига тушириб олинган. Ўтказилган экспертиза пулларнинг сохталигини тасдиқланди. Суриштирув давомида ушбу Жиззах вилояти “Ҳаваслик” маҳалласи ҳамда Жиззах шаҳрининг “Мирзо Улуғбек” маҳалласидан яшовчи икки нафар шахс ушланди. Улардан 10 дона Paynet чеки, 39 дона банк квитансияси ва 1 дона банк пластик картаси ҳужжатлаштириб олинган. Уларнинг кўрсатмаси асосида 4 та Paynet шохобчасидан 4 ярим миллион сўм миқдордаги қалбаки пуллар олинди.
Шунингдек, айбланувчилардан бири “Мирзо Улуғбек” маҳалласида жойлашган қурилиши тугалланмаган кўп қаватли бинога яшириб қўйган 18 миллион сўм миқдордаги қалбаки пуллар ҳужжатлаштириб олинди. Суриштирув жараёнида гумонланувчилардан бири қалбаки пулларни Самарқанд вилояти Паяриқ тумани “Хўжаисмоил” маҳалласида истиқомат қилувчи шахсдан сотиб олганлигини билдирган. Яъни у қалбаки 28 миллион сўмни 18 миллион сўмга сотиб олган.
Бундан ташқари, ИИО ходимлари Самарқанд вилояти Паяриқ тумани “Хўжаисмоил” маҳалласида яшовчи шахсни қўлга олганда у 200 минг сўмлик қалбаки купюраларни 60 минг сўмдан Бухоро шаҳри “Пиридасгир” маҳалласида яшовчи шахсдан сотиб олганини билдирган. Жиззах вилояти ИИБ ЖҚБнинг коррупция ва иқтисодий жиноятларга қарши курашиш бўлими ходимлари Бухоролик ходимлар билан биргаликда тезкор тадбирни давом эттириб, Бухоро шаҳрининг “Фурқат” маҳалласи ҳудудида 30 миллион сўмни 100 миллион сўм қалбаки пулга алмаштирган шахсни қўлга олди. Кўп ўтмай сохта пулларни тайёрлашда иштирок этган Бухоро шаҳрининг “Фурқат” ҳамда “Муртазоев” маҳалласида яшовчи 3 нафар шахс ушланди. Уларнинг турар жойидан 336 миллион 400 минг сўм сохта пул, 4 та компьютер жамланмаси, 5 дона принтер, 3 дона қоғоз кесиш мосламаси ва 35 дона рангсиз лаклар ҳужжатлаштириб олинди.
Қайд этилишича, гумонланувчилардан умумий ҳисобда 462 миллион 400 минг сўм қалбаки ашёвий далил тариқасида ҳужжатлаштириб олиниб, таркибида 6 киши бўлган жиноий гуруҳ фаолиятига чек қўйилди ва уларнинг барчаси вақтинча сақлаш ҳибсхонасига жойлаштирилди. Айни пайтда юқоридаги ҳолатлар юзасидан тергов ҳаракатлари давом этмоқда.
Изоҳ (0)