O‘zbekistonda 2024-yildan boshlab “spravka”, “089 forma” kabi tibbiy ma’lumotlar butunlay elektron ko‘rinishga o‘tadi

O‘zbekistonda vaqtincha mehnatga layoqatsizlik varaqalari va boshqa tibbiy ma’lumotnomalar berilishi bosqichma-bosqich elektron shaklga o‘tkaziladi. Bu prezidentning “2022–2026-yillarga mo‘ljallangan Yangi O‘zbekistonning taraqqiyot strategiyasini “Insonga e’tibor va sifatli ta’lim yili”da amalga oshirishga oid davlat dasturi to‘g‘risida”gi farmonida ko‘zda tutilgan.

Unga ko‘ra, vaqtincha mehnatga layoqatsizlik varaqalari va boshqa tibbiy ma’lumotnomalar Navoiy va Sirdaryo viloyatlarida – 2023-yil 1-iyuldan boshlab elektron shaklga o‘tkaziladi.

Toshkent shahri, Toshkent va Samarqand viloyatlarida shu yilning 1-oktabrdan boshlab, respublikaning boshqa hududlarida esa 2024-yil 1-yanvardan boshlab joriy etiladi.

Farmonga ko‘ra, 2024-yil 1-yanvardan boshlab tibbiy ma’lumotnomalarni qog‘oz shaklda talab qilish taqiqlanadi.

Jahon tajribasi

Birlashgan Arab Amirliklari

Xorijiy davlatlarda, masalan, BAAda tibbiy ma’lumotnoma (medical certificate yoki doctor’s certificate) olish bir muncha murakkab jarayon.

Xususan, Dubay shahrida tibbiy ma’lumotnoma olishingiz, uni akkreditatsiya qilishingiz siz kasallik tufayli ta’tilda bo‘lgan kunlar soniga bog‘liq. Agar ta’tilning davomiyligi besh kun yoki undan kam bo‘lsa, siz tibbiy komissiya tasdig‘isiz ham ma’lumotnoma olishingiz mumkin. Agar Dubaydagi kasallik ta’tilingiz besh kundan ortiq bo‘lsa, tibbiy bo‘linmaning roziligi talab qilinadi. Ta’til bir oyga cho‘ziladigan bo‘lsa, siz mamlakat Sog‘liqni saqlash va profilaktika vazirligining Oliy Tibbiyot qo‘mitasidan ma’lumot olishingiz kerak bo‘ladi.

Koreya Respublikasi

Janubiy Koreyada tibbiy ma’lumotnoma bevosita qabulga yozilgan shifokordan so‘ralmaydi. Uni olish uchun yana bir marta konsultatsiyadan o‘tish kerak bo‘ladi. 

Avstraliya

Avstraliyada tibbiy ma’lumot uchun arizani onlayn hamda offlayn tarzda yuborish mumkin. Bir kunlik tibbiy ma'lumotnomalar 19 dollarni tashkil qiladi. Qisqa so'rovnoma to'ldiriladi va shifokorlardan biri so'rovingizni ko'rib chiqadi. So‘rov tasdiqlansa, tibbiy ma'lumotnomangizni bir necha daqiqada pochta qutingizdan olasiz.