Самарқанддаги шифохонада ўз ҳамкасбларини чойнак билан урган тиббиёт ходимига жиноят иши қўзғатилди 

Ижтимоий тармоқларда Самарқанд вилоятининг Паяриқ туманидаги Челак шифохонасида бош шифокорнинг ўғли ва келини ҳамшираларни калтаклагани айтилган видеолавҳа тарқалди. Соғлиқни сақлаш вазирлиги воқеага аниқлик киритди.

Маълум қилинишича, 2 февраль куни соат тахминан 15:30 ларда Самарқанд вилояти Паяриқ туман тиббиёт бирлашмасига қарашли Челак 1-сон шифохонасининг ўрта тиббиёт ходимлари — А.Н. ва Б.Ш. ўртасида ўзаро давом этиб келаётган оилавий келишмовчилик сабаб жанжал юзага келган.

Бунинг натижасида ҳамшира Б.Ш. ва унинг онаси, кичик тиббий ходим М.Д. жиддий тан жароҳати олган. Шундан сўнг жабрланган ҳар икки беморга зудлик билан биринчи тиббий ёрдам кўрсатилиб, шу куни мазкур шифохонанинг шошилинч жарроҳлик бўлимига ётқизилган.

Вилоят ИИБ матбуот хизматининг маълум қилишича, А.Н. уларни стол устида турган чойнак билан урган. 

Текширувлар натижасида ҳамшира Б.Ш.га бурун суяги ёпиқ синиши, бурун усти соҳаси урилиб, кесилган жароҳати, бош мия чайқалиши, кичик тиббий ходим М.Д.га эса бурун усти, чап ёноқ соҳаси, чап кўз ички бурчаги урилиб, кесилган жароҳати, бош мия чайқалиши ташхиси қўйилган.

Беморларга белгиланган стандартлар асосида тиббий муолажалар кўрсатилгач, 11 февраль куни қониқарли аҳволда уйига рухсат берилган.

Айни пайтда ўз ҳамкасбларига тан жароҳати етказишда гумонланаётган фуқаро А.Н.га нисбатан ички ишлар органлари томонидан Жиноят кодексининг 109-моддаси (қасддан баданга енгил шикаст етказиш) 2-қисми билан жиноят иши қўзғатилиб, тергов-суриштирув ҳаракатлари олиб борилмоқда.

“Ўз навбатида, вазирлик томонидан ушбу воқеа бўйича ўтказилган ўрганишлар якунида бундай салбий ҳолатнинг юзага келишига эътиборсиз бўлган ҳамда муассаса ходимлари ўртасида касб этикаси ва мажбуриятларига риоя этиш юзасидан етарлича тушунтириш олиб бормаган бир қатор масъулларга нисбатан қонунда белгиланган тартибда тегишли жазо чоралари қўлланилди”, — дейилади вазирлик хабарида.