Ijtimoiy tarmoqlarda “Yangi qurilgan binoning ahvoli. Andijon shahrida qurilishi yakunlanmagan binoning oxirgi qavati” sarlavhali video tarqaldi. Qurilish va uy-joy kommunal xo‘jaligi vazirligi holatga munosabat bildirdi.
Xabar yuzasidan Andijon viloyat qurilish sohasida nazorat inspeksiyasi tomonidan olib borilgan o‘rganish ishlaridan ma’lum bo‘lishicha, obyektning qurilish ishlari 2022-yilning martida boshlangan. Nazorat tadbirlari davomida fuqaro I.U. tegishli shaharsozlik hujjatlarisiz inspeksiyani xabardor qilmasdan, obyektda qo‘shimcha 2 qavat (4-5-qavat) qo‘shib, qurilish ishlarini amalga oshirgani aniqlangan.
Ushbu holat bo‘yicha fuqaro I.U.ga Ma’muriy javobgarlik to‘g‘risidagi kodeksning 99-moddasi (shaharsozlik to‘g‘risidagi qonunchilikni buzish) 7-qismi bilan maʼmuriy chora qo‘llanilgan.
Qurilish ishlari davomida binodagi temir-beton plitalarining qulab tushishi va bino yuqori qavatlaridagi devorlar buzilishiga ishchilar tomonidan temir-beton plitalar ustiga meʼyordan (meʼyor bo‘yicha 1 metr kvardat yuzaga 800 kilo yuk tushishi belgilangan, lekin joyida ushbu yuzaga 1400-1500 kilo atrofida yuk joylangan) ortiq qurilish materiallari yuklangani hamda yuklarni avtokranda tushirish jarayonida dinamik qo‘yish hosil bo‘lishi sabab bo‘lgan.
Inspeksiya tomonidan obyektning shaharsozlik hujjatlarisiz qurilgan va yaroqsiz holga kelgan 4 va 5-qavatlarini fuqaro I.U. tomonidan texnika xavfsizlik talablariga qatʼiy rioya etgan holda buzib (demontaj) olishi kerakligi tushuntirilgan va binoning 5-qavati demontaj qilingan.
Qayd etilishicha, hozirda fuqaro I.U.ning moliyaviy muammolari sabab binoning 4-qavatini buzish va qurilish ishlarini davom ettirish vaqtincha to‘xtatilgan. Obyektning demontaj ishlarini bajarish va qurilishni davom ettirish inspeksiya tomonidan nazoratga olingan.
Izoh (0)