Украинанинг Россия томонидан босиб олинган Мариупол шаҳрида қайта тиклаб бўлмайдиган бинолар бузилиб, чиқиндилардан йўл қуришда фойдаланиладиган бетон шағаллар ҳосил қилинади. Бу ҳақда шаҳарнинг оккупацион ҳокимияти вакили, “Коммуналник” муниципал корхонаси директори Дмитрий Хажинов “РИА Новости”га маълум қилди.
Унинг сўзларига кўра, ҳозирда Мариуполнинг барча туманларида шаҳар ўққа тутилганидан кейин қайта тиклаш имконсиз бўлиб қолган биноларни бузиш ишлари олиб борилмоқда. Россия Қурилиш вазирлиги бинолар чиқиндиларини уларни бетон шағалларга айлантирадиган майдалаш заводларига топширди, кейинчалик улар йўл қурилишида қўлланилади, дейди Хажинов.
Унинг сўзларига кўра, айни пайтда Мариуполда 2,5 миллион тоннага яқин қурилиш чиқиндилари тўпланган бўлиб, бу 37 гектар майдонни эгаллайди.
Россия қўшинлари Мариуполга уруш бошида ҳужум қилганди. Улар шаҳарни қаттиқ бомбардимон қилди, оқибатда шаҳар деярли бутунлай вайрон бўлди.
Мариуполда қанча тинч аҳоли ҳалок бўлгани номаълум. Украина томонининг тахминларига кўра, гап ўн минглаб одамлар ҳақида кетмоқда.
2022 йил май ойи охирида, “Азовстал” заводини ҳимоя қилаётган украиналик ҳарбийлар ўз қўмондонлиги буйруғига биноан режали таслим бўлганидан кейин Россия армияси Мариуполни узил-кесил қўлга киритганини эълон қилди.
Изоҳ (0)