Toshkent viloyatining Chinoz tumanida yorilgan muz orasida qolib ketgan Lacetti haydovchisiga yordam berildi. Bu haqda Toshkent viloyati hokimligi axborot xizmati xabar berdi.
Maʼlum bo‘lishicha, voqea bugun, 26-yanvar kuni soat 10:00 da sodir bo‘lgan.
Chirchiq daryosining Chinoz tumani hududidan oqib o‘tuvchi qismida daryo suvi sathining ko‘tarilishi kuzatildi. Daryo suvlari qirg‘oqdan toshib, tumandagi “Chinmasjid” mahallasi hududidagi yo‘lda ko‘lmak hosil qilgan va sovuq harorat taʼsirida muzlagan. Joriy yilning 26-yanvar kuni soat 10:00 larda doimiy yashash joyi Toshkent shahrida bo‘lgan fuqaro Lacetti rusumli avtomashinasida mazkur mahalladagi dala hovlisiga ketayotgan vaqtida muzlagan ko‘lmak ustidan harakatlangan. Mashinaning og‘irligiga dosh bera olmagan muz yorilishi oqibatida avtomashina o‘sha joyda qolib ketgan, — deyiladi viloyat hokimligi bergan maʼlumotda.
Maʼlum bo‘lishicha, holat yuzasidan soat 10:30 da Toshkent viloyati Favqulodda vaziyatlar boshqarmasi Tezkor boshqaruv markaziga xabar kelib tushgan.
Qisqa vaqt ichida Chinoz tumani Favqulodda vaziyatlar bo‘limi qutqaruvchilari voqea joyiga yetib borib, muz orasida qolib ketgan fuqaroga amaliy yordam ko‘rsatishgan. Sodir bo‘lgan holat oqibatida fuqaroga tan jarohati yetmagan, — deydi masʼullar.
Izoh (0)