May oyigacha bitta bankomatda ham Uzcard, ham Humo kartalariga xizmat koʻrsatish mumkin boʻladi. Bu haqda Markaziy bank raisi Mamarizo Nurmurodov 26-yanvar kuni oʻtkazilgan matbuot anjumanida maʼlum qildi, deya xabar berdi “Daryo” muxbiri.
Uzcard va Humo tizimlari integratsiyasi 2021-yilda boshlangan edi. Mamarizo Nurmurodovning aytishicha, jarayon choʻzilishiga sabab Uzcard bilan kelishuv ishlari uzoq vaqt olgani bilan bogʻliq.
“Uzcard xususiy korxona boʻlgani uchun u bilan kelishuvga erishishda qiyinchiliklar boʻldi. Hozir kelishuvga erishdik va integratsiya ishlarini boshladik. Birinchi navbatda may oyigacha bankomatlar integratsiya qilinadi va bu boʻyicha texnologik jarayon ketmoqda.
Ikkinchi bosqichda terminallar integratsiya qilinadi. Toʻgʻri, jarayon choʻzilib ketdi. Markaziy bankni bu operatsiyalardan tijoriy talablari yoʻq. Uzcard maʼlum operatsiyalarni komissiyasiz qiladi. Shu kabi qismlarini kelishishga toʻgʻri keldi. Va bugungi kunda bu kelishuvga erishildi”, — dedi rais.
Avvalroq Humo va Uzcard toʻlov tizimlari 2021-yildagi oʻzaro integratsiyalashuvning birinchi bosqichini yakunlagani xabar qilingandi.
Izoh (0)