Kanada hukumati tub aholi vakillari bilan o‘tmishda ularga nisbatan tahqirlashlar va madaniy huquqlarning cheklanishi tufayli tovon puli haqida kelishib oldi. Bu haqda Kanada hukumati saytida xabar berildi.
Kanada mamlakatning tub aholisiga ular qachonlardir xo‘rlangani, madaniyat va tilga oid huquqlari cheklangani uchun tovon puli sifatida 2,8 milliard Kanada dollari (taxminan 2,1 milliard AQSH dollari) to‘lashga rozi bo‘ldi.
Kanada hukumatiga nisbatan da’vo 2012-yilda tub jamoatchiliklarning 325 nafar vakillari tomonidan guruh bo‘lib sudga kiritilgan edi. Ular XIX asrdan XX asr oxirigacha bo‘lgan davrda o‘z tili va madaniyatiga nisbatan genotsid uchun tovon puli talab qildi. Tomonlar erishgan kelishuv endi mamlakat Federal sudi tomonidan ma’qullanishi kerak.
Mablag‘ maxsus jamg‘armaga o‘tkazib berilishi, uni tub aholi o‘z ixtiyoriga ko‘ra ishlatishi mumkin bo‘lishi ko‘zda tutilmoqda.
“Kanadaga o‘z tarixini tan olish uchun, o‘zi amalga oshirgan genotsidni e’tirof etish uchun va maktab-internatlar tomonidan xalqlarimizga yetkazilgan kollektiv zararni tan olish uchun juda ko‘p vaqt kerak bo‘ldi”, — deya qarorni izohladi da’vogarlardan biri, tub xalqlar vakili Garri Feshuk.
Kanadada tub aholining farzandlari uchun internat maktablari 19-asrning o‘rtalaridan 20-asrning oxirlariga qadar mavjud bo‘lgan. Bunday maktablarda 150 mingdan ortiq bola o‘qitilgan, ular oilalaridan olib qo‘yilib, majburiy assimilyatsiya qilingan. Maktab-internat tarbiyalanuvchilari zo‘ravonliklarga duchor bo‘lgan, yaxshi ovqatlanish va davolanishdan mahrum qilingan.
2021-yil may oyida Britaniyaning Kolumbiya provinsiyasidagi sobiq maktab-internati hududida 200 dan ortiq bolaning qoldiqlari bo‘lgan yirik qabr topilgandi. Kanada bosh vaziri Jastin Tryudo ommaviy qabrni “Kanada tarixidagi qorong‘u va sharmandali bobning og‘riqli nishonasi” deb atadi.
2021-yil iyunida Kanadaning Saskachevan provinsiyasi tub aholisi jamoatchiligi vakillari Kanada tub xalqlarining bolalari uchun mo‘ljallangan sobiq maktab-internat hududida 751 ta noma’lum qabr topilgani haqida xabar berdi. Maktab-internat 1899—1997-yillarda faoliyat olib borgan. Uning hududida qabriston bor va undan nomsiz qabrlar topilgan. Georadar yordamida topilgan ushbu qabrlarda kimlar dafn etilgani hali noma’lum.
Izoh (0)