Германия ташқи ишлар вазири Анналена Бербокнинг таъкидлашича, Германия Польша ёки бошқа мамлакатнинг Leopard 2 немис танкларини Украинага юборишига қаршилик қилмайди.
«Ҳозирча бундай сўров келиб тушгани йўқ, аммо агар сўралса, биз тўсқинлик қилмаймиз», — деди Бербок журналистларнинг агар Польша Leopard’ларни Украинага юборишни истаса, нима бўлиши ҳақидаги саволига жавобан.
Der Spiegel нашрининг ёзишича, ўтган ҳафта, 18 январь куни Германия ташқи ишлар вазирлиги раҳбари Бундестагдаги йиғилишда ҳам Берлин немис танкларини Киевга ўтказишга қарор қилган учинчи давлатларнинг сўровини маъқуллашини айтганди.
Германия қонунчилигига кўра, Германияда ишлаб чиқарилган қуролларга эга давлатлар учун бу қуролларни Германия ҳукуматининг розилигисиз уруш зонасига юбориш тақиқланган.
Украина ҳукумати анчадан бери Ғарб иттифоқчиларидан Киевга танклар, жумладан, Германиянинг Leopard 2 танкларини беришни сўраб келмоқда. НАТОнинг бир қанча давлатлари, жумладан, Польша ҳам ўзидаги танкларни топширишга тайёрлигини билдирган, бироқ бунинг учун Германиядан рухсат олиш керак. Украина иттифоқчилари 20 январь куни Рамштейн базасида бўлиб ўтган йиғилишда танклар етказиб бериш масаласини муҳокама қилди, аммо якуний қарор қабул қилинмади. Шундан сўнг Польша, агар Германия Киевга Leopard 2 танкларини беришга рози бўлмаса, Украинани қўллаб-қувватлаш учун бошқа Европа давлатлари билан «кичикроқ коалиция» тузишга тайёрлигини маълум қилди.
Изоҳ (0)