Rossiya Estoniya bilan diplomatik aloqalari darajasini pasaytirib, diplomatik vakillar maqomini vaqtinchalik vakolatli shaxslarga o‘zgartirdi. Bu haqda Rossiya Tashqi ishlar vazirligi xabar berdi.
Estoniya elchisi 7-fevralga qadar Moskvani tark etishi kerak bo‘ladi.
Rossiya TIV o‘z qarorini yaqinda Tallindagi Rossiya elchixonasi xodimlarining qisqartirilishiga javob deb atadi.
Shuningdek, TIV xabarida aytilishicha, Estoniya so‘nggi yillarda Rossiya bilan munosabatlarni “qasddan buzmoqda”.
“Ommaviy rusofobiya, bizning mamlakatimizga nisbatan dushmanlik tuyg‘usining singdirilishi Tallin tomonidan davlat siyosati darajasigacha olib chiqildi”, — deyiladi muassasa xabarida.
Estoniya 11-yanvar kuni Tallindagi Rossiya elchixonasi xodimlarini ikki marta qisqartirishni talab qildi. Boltiq mamlakati hukumati buni mamlakatlar diplomatik missiyalarida “paritetga yoki lavozimlar sonida tenglikka erishish” zaruriyati bilan izohladi.
Rossiya Ukrainaga bostirib kirganidan keyin Estoniya bir necha marta rossiyalik diplomatlarni mamlakatdan chiqarib yubordi. Shuningdek, Estoniya hukumati tashabbusi bilan Rossiyaning Tartu va Narvadagi diplomatik missiyalari yopildi.
Avvalroq Estoniya Yevropa Ittifoqi mamlakatlaridan birinchi bo‘lib Rossiya aktivlarini Kiyevga o‘tkazishga tayyorlanayotgani xabar berilgan edi. Estoniya mamlakatda muzlatilgan Rossiya aktivlarini Ukrainaga o‘tkazish imkonini beruvchi qonunchilik bazasini 2023-yilning yanvar oyi oxirigacha yaratishni rejalashtirmoqda.
Eslatib o‘tamiz, o‘tgan yil oktabrida Estoniya parlamenti Rossiyani terrorizmga homiylik qiluvchi davlat deb e’lon qilgan edi.
Izoh (0)