“Tolibon” vakillari Twitter’da pulli verifikatsiya xizmatiga ro‘yxatdan o‘tishni boshladi — ulardan ba’zilarining akkauntlarida “ko‘k galochka”lar paydo bo‘ldi.
Ayni paytda “Tolibon”ning ikki rasmiysi va Afg‘onistondagi harakatning asosiy tarafdorlaridan to‘rt nafari “galochka”lardan foydalanmoqda, deb ta’kidlaydi BBC.
“Tolibon”ning “axborotdan foydalanish” departamenti rahbari Hidoyatulloh Hidoyatda hozir verifikatsiya belgisi mavjud. Uning akkauntida 187 000 obunachi bor va u yerda “Tolibon” hukumati haqida asosiy ma’lumotlar joylashtirib boriladi.
Afg‘oniston Axborot va madaniyat vazirligining yuqori martabali xodimi Abdul Haq Hammadning ham akkauntida ko‘k belgi bor. Uning obunachilari 170 mingta.
Eslatib o‘tamiz, ilgari “ko‘k galochka” Twitter tomonidan tasdiqlangan “faol, e’tiborga molik va haqiqiy jamoat manfaatiga xizmat qiluvchi akkauntlar”ga berilgan hamda ularni sotib olish mumkin emasdi. Biroq milliarder Ilon Mask ijtimoiy tarmoqni sotib olganidan so‘ng, endi istalgan foydalanuvchi yangi Twitter Blue xizmati orqali “galochka” xarid qilishi mumkin.
Twitter Blue xizmati dekabr oyida ishga tushdi. Uning narxi oyiga 8 dollar, Apple qurilmalarida Twitter’dan foydalanadiganlar qo‘shimcha 11 dollar to‘laydi. Twitter Blue paydo bo‘lishidan oldin “Tolibon” rasmiy akkauntlarining hech birida “ko‘k galochka” bo‘lmagan.
“Tolibon” rasmiylari va tarafdorlari Twitter’ning faol foydalanuvchilari bo‘lib, ushbu platformadan muhim xabarlarni tarqatish uchun foydalanadi.
Izoh (0)