Россия мудофаа вазири Сергей Шойгу Қуролли кучлар таркибини 1,5 миллион кишигача ошириш масаласи бўйича йиғилиш ўтказди, деб хабар бермоқда Мудофаа вазирлиги.
Унда вазир Карелия республикасида армия корпусини шакллантириш, қуруқликдаги қўшинлар таркибида учта мотоўқчилар дивизиясини ва иккита ҳарбий-десант қўшинлари дивизиясини шакллантиришни ҳамда Ҳарбий-денгиз флоти, Ҳаво-космик кучлари ва Стратетегик мақсадли ракета қўшинлари жанговар таркибини кучайтиришни топширди. Шунингдек, у иккита — Москва ва Ленинград ҳарбий округларини яратишни буюрди.
Мажлис чоғида Шойгу Россиянинг янги субъектлари ҳудудларида мустақил қўшинлар гуруҳларини яратиш, шунингдек, Ғарбий, Марказий, Шарқий ҳарбий округларда ва Шимолий флотдаги еттита мотоўқчи бригадаларни мотоўқчи дивизиялар сифатида қайта ташкил этиш зарурлигини айтди. Россия қуролли кучлари таркиби, сони ва тузилмасига киритиш таклиф этилган ўзгаришлар 2023—2026 йилларда жорий қилиниши режалаштирилмоқда.
21 декабрь куни Шойгу Россия қуролли кучлари сонини 1,5 миллион кишига, шу жумладан, 670 минг контракт аскарига етказиш кераклигини айтган эди. Шунингдек, у ҳарбий хизмат учун ёш чегарасини босқичма-босқич оширишни таклиф қилиб, ҳарбий хизматга қабул қилишни 18 ёшдан 21 ёшгача, ёш чегарасини эса 27 ёшдан 30 ёшгача оширишни илгари сурди.
1 январь куни Россия президенти Владимир Путиннинг «Россия Федерацияси Қуролли кучлари штат сонини белгилаш тўғрисида»ги фармони кучга кирди, унга кўра, Россия қуролли кучлари ҳарбий хизматчилари сони 1 150 628 киши деб белгиланган.
Аввалроқ Шойгу «махсус ҳарбий операция олиб борилаётган зона»да «Восток» қўшин гуруҳи штабини кўздан кечиргани хабар берилган эди.
Изоҳ (0)